Пра гэта сказаў прэзыдэнт Францыі Эмануэль Макрон пасьля сустрэчы з прэзыдэнтам Гвінэі і кіраўніком Афрыканскага зьвязу Альфам Кондэ. Макрон назваў відэа, на якім зафіксаваны факт продажу мігрантаў на аўкцыёне ў Лібіі, «скандальным» і «непрымальным». Відэа было паказана амэрыканскім тэлеканала CNN на мінулым тыдні і выклікала шырокі рэзананс.
Кіраўнік Францыі заявіў, што хоча вывесьці рашэньне гэтай праблемы на ўзровень ААН.
«Францыя ўзяла на сябе ініцыятыву пачаць расьсьледаваньне ў Радзе Бясьпекі ААН пытаньня аб становішчы мігрантаў у Лібіі. Я хачу вывесьці барацьбу з кантрабандыстамі, якія зьдзяйсьняюць такія злачынствы, на іншы ўзровень і пачаць супрацоўніцтва з усімі краінамі рэгіёну, каб ліквідаваць гэтыя сеткі», — заявіў францускі прэзыдэнт.
Лібійскія ўлады ўжо пачалі расьсьледаваньне па факце апублікаванага відэазапісу. Паводле папярэдніх зьвестак, на тэрыторыі Лібіі дзейнічаюць некалькі аўкцыёнаў, дзе гандляры рабамі, выкрадаючы уцекачоў, якія спрабуюць патрапіць з Афрыкі ў Эўропу, прадаюць іх для цяжкай працы на фэрмах.