Лінкі ўнівэрсальнага доступу

Рыгор Кастусёў дамогся праз суд правільнай пэнсіі


 Рыгор Кастусёў
Рыгор Кастусёў

Старшыні Партыі БНФ Рыгору Кастусёў 17 лістапада выплацілі першую пэнсію.

СМС пра налічэньне і пералічэньне на банкаўскую картку першай пэнсіі прыйшло на яго мабільны тэлефон.

«Гэта першая пэнсія ў маім жыцьці, цяпер я афіцыйны пэнсіянэр. Але для таго, каб атрымаць гэтую пэнсію і знайсьці гады майго стажу, што я добрасумленна адпрацаваў з 1974 года, мне давялося прайсьці цэлы шлях „пакутаў“ праз пракуратуру, праз суд, праз два раённыя фонды сацыяльнага забесьпячэньня».

СМС пра першую пэнсію Рыгора Кастусёва
СМС пра першую пэнсію Рыгора Кастусёва

Рыгор Кастусёў распавёў, што адпрацаваў на прадпрыемствах у Шклове і Магілёве галоўным інжынэрам і дырэктарам саўгаса ў Бялыніцкім раёне.

«Менавіта з антычалавечай сыстэмай я сутыкнуўся ў Бялыніцкім раёне. Я працаваў галоўным інжынэрам у саўгасе «Друць», ён зараз ОАО «Новая Друць», і саўгасе «Іскра» дырэктарам. Гэтыя гаспадаркі цяпер аб’яднаныя. За даведкамі ў гэтую гаспадарку мне давялося хадзіць чатыры месяцы. Я патрабаваў даць мне даведку з улікам усіх маіх грашовых выплат падчас працы галоўным інжэнэрам і дырэктарам, а гэта заробак, прэміі, даплаты па выніках працы за год. Але мне імкнуліся даць толькі зьвесткі пра заробак, аклад. На маё патрабаваньне ўлічыць даплаты і прэміі, а яны складалі ад 500-700 рублёў да паўтары тысячы, у бугальтэрыі ОАО «Новая Друць» прагучаў забойны аргумэнт: «Калі мы гэта ўсё ўлічым, то для вас дужа многа будзе», - сказаў карэспандэнту Свабоды Рыгор Кастусёў.

Толькі пасьля звароту ў пракуратуру і аддзел сацыяльнага забесьпячэньня Бялыніцкага раёну, а пасьля ў суд Шклоўскага раёна, дзе адбыліся тры паседжаньні, Рыгору Кастусёву ўдалося дамагчыся ўключэньня прэмій і даплат у налічэньне пэнсіі.

Гэта проста «кідалава»

«Гэта цэлая эпапэя. Бо там было такое, што згубілі некаторыя гады і месяцы. Але дзякуй богу, суд да гэтага паставіўся станоўча і разабраўся ва ўсіх нюансах. Але гэта я змог дамагчыся, бо працаваў на пасадах і разумею сытуацыю. А колькі ж людзей засталіся зь ня ўлічанымі заробкамі?!Таму тут, відаць, варта ўмяшацца Камітэту дзяржкантролю і рэспубліканскай пракуратуры. Бо я думаю, што пацярпелі не адзінкі, а можа дзясяткі і сотні чалавек на прадпрыемстве, якое цяпер ахоплівае палову Бялыніцкага раёна. Дарэчы, кіруе ОАО «Новая Друць» сэнатар Анатоль Драздоў. Але я думаю, што такая сытуацыя можа быць і па ўсёй краіне. Гэта проста «кідалава».

Першая пэнсія Рыгора Кастусёва склала 423 рублі 13 капеек.

«Мне налічылі за месяц і крыху больш. Але тут яшчэ не ўлічаныя дадзеныя, якія мне ўдалося адстаяць праз суд. Бо там адзін год прапаў, у некаторых гадах па некалькі месяцаў прапала. Калі гэта залічаць, будзе больш. Я думаю, што за 300 рублёў будзе. Гэта ўжо хоць больш-менш справядліва. Я не патрабаваў нешта лішняе, а тое, што я зарабіў».

Рыгор Кастусёў афіцыйна выйшаў на пэнсію 17 кастрычніка 2017 года.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG