Лінкі ўнівэрсальнага доступу

Канапацкая аб праекце бюджэту-2018: «Я б назвала яго антысацыяльным»


Ганна Канапацкая
Ганна Канапацкая

17 лістапада ў Авальнай залі Дому ўраду дэпутаты Палаты прадстаўнікоў абмяркуюць праект бюджэту Беларусі на 2018 год з прэм’ер-міністрам Андрэем Кабяковым і міністрамі. Свабода падсумавала, што на сёньня вядома пра новы бюджэт.

Такія сустрэчы не зьяўляюцца ўжо чымсьці новым. І сярод дэпутатаў, і сярод журналістаў яны завуцца «нулявым чытаньнем». Хоць, паводле заканадаўства, бюджэт прымаецца ў двух чытаньнях — першым і другім.

Паколькі сустрэча рабочая, то журналістаў на яе не запрашаюць, патлумачылі ў прэсавай службе Палаты.

Дэпутатка Палаты прадстаўнікоў Ганна Канапацкая ўжо вывучыла дакумэнты, якія тычацца новага бюджэту.

«Ад многіх я чую, што бюджэт добры, што ён з прафіцытам, — кажа Свабодзе дэпутатка. — Але ў мяне стаўленьне да праекту асноўнага фінансавага дакумэнту краіны крытычнае. Так, у ім закладзены рост прыбыткаў. Аднак ён не на столькі вялікі, як хацелася б. Можна казаць, што гэта ўзровень статыстычнай хібнасьці».

Паводле дэпутаткі, бюджэт не ўлічвае тых структурных рэформаў, якія патрэбны эканоміцы:

«І яшчэ я назвала б яго антысацыяльным. Там выдаткоўваюцца грошы на міліцыю, вайсковае ведамства. А вось на мэдыцыну і іншыя сацыяльныя патрэбы грошай заплянавана няшмат».

Ганна Канапацкая кажа, што ў праекце бюджэту плянуюцца некаторыя зьмены ў падатковай сыстэме: у Падатковы кодэкс, у закон аб бухгальтэрскім уліку. Дэпутатка разам зь бізнэс-супольнасьцю падрыхтавала 21 зьмену ў Падатковы кодэкс. Але ці будуць яны ўлічаныя, спадарыня Канапацкая пакуль ня ведае.

З двух сцэнароў выбралі кансэрватыўны

Сёлета ў канцы жніўня асноўныя парамэтры рэспубліканскага бюджэту разглядалі на пасяджэньні прэзыдыюму ўраду. Прэм’ер Андрэй Кабякоў тады запатрабаваў зрабіць бюджэт збалянсаваным.

Андрэй Кабякоў
Андрэй Кабякоў

«Мы ня можам траціць больш, чым зарабляем, і абавязаны жыць па сродках. Плянуецца, што даходы бюджэту павялічацца ў 2018 годзе на 6,2%», — сказаў ён.

Кабякоў адзначыў, што для распрацоўкі праектаў бюджэту ўзялі два сцэнары разьвіцьця эканомікі.

Першы — мэтавы сцэнар, на аснове якога распрацаваны праект прагнозу сацыяльна-эканамічнага разьвіцьця Беларусі. Тут прагназуецца рост ВУП на 3,4%, прадукцыйнасьці працы — на 2,8%, інвэстыцыі ў асноўны капітал перавысяць чаканыя інвэстыцыі 2017 году на 6,8%^; экспарт прырасьце на 6% пры практычнай збалянсаванасьці замежнага гандлю. Урад разьлічвае на прыцягненьне непасрэдных замежных інвэстыцый у памеры 1,45 мільярда даляраў. Чакаецца, што інфляцыя налета не перавысіць 7%, а рэальныя прыбыткі насельніцтва падрастуць на 3,2%.

Другі — сцэнар кансэрватыўны. У ім усе названыя вышэй лічбы значна больш сьціплыя. Так, ВУП вырасьце толькі на 1,2%, прадукцыйнасьць працы — на 0,9%. Нават прафіцыт бюджэту ў гэтым варыянце на дзіва сьціплы — усяго 500 мільёнаў рублёў, амаль утрая менш, чым плянавалі на бягучы год. Экспэрты тлумачаць гэта тым, што ў праекце новага бюджэту кошт барэля нафты закладзены як 45 даляраў, у той час як у бюджэт 2017 году разьліковая лічба была 55 даляраў. Аднак і 45 даляраў абяцаюць бюджэт з прафіцытам.

Ужо чацьвёрты год запар усе бюджэты плянуюцца менавіта з прафіцытам. Першы намесьнік міністра фінансаў Максім Ермаловіч нават сказаў журналістам:

«Мы захоўваем бюджэтнае правіла, пры якім бюджэт фармуецца з прафіцытам. Памер гэтага прафіцыту наўпрост карэлюецца з паступленьнямі прыбыткаў ад нафтавага сэктару».

Палёгкі ў падатках, падобна, ня будзе

У праекце бюджэту ўзровень падатковай нагрузкі абазначаны ў 25% ад валавога ўнутранага прадукту. Гэта столькі ж, як і сёлета. Такім чынам, выглядае, што абяцаньне ўладаў не ўводзіць новыя падаткі да 2020 году будзе ў наступным годзе выкананае. Пры гэтым невядома, кажуць экспэрты, што будзе прапісана ў новым варыянце так званага прэзыдэнцкага «дэкрэту аб дармаедах». Абноўленага варыянту дэкрэту няма пакуль і ў дэпутатаў.

Бюджэт не сьвятая карова

Пасьля прыняцьця пакету бюджэтных законапраектаў абедзьвюма палатамі Нацыянальнага сходу яго падпісвае кіраўнік Беларусі. Звычайна гэта робіцца ў апошнія дні сьнежня.

Як сказаў Свабодзе кіраўнік фонду Мізэса Яраслаў Раманчук, «у Беларусі бюджэт не сьвятая карова».

Яраслаў Раманчук
Яраслаў Раманчук

«Яго карэктуюць амаль кожны квартал па некалькі разоў. Такое права маюць урад і прэзыдэнт. Я ня ведаю ніводнага году, калі б яны гэтым не карысталіся», — сказаў эканаміст.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG