Лінкі ўнівэрсальнага доступу

Бабуля віцебскага школьніка, які ўвасобіўся ў Леніна: Ён хацеў прыехаць з матросамі


Удзельнікі мітынгу ў Віцебску
Удзельнікі мітынгу ў Віцебску

Нават стогадовы юбілей не прымірыў паміж сабой віцебскіх камуністаў — прадстаўнікоў праўладнай Камуністычнай партыі Беларусі і апазыцыйнай Партыі левых «Справядлівы сьвет». Прадстаўнікі ўладаў і Беларускага рэспубліканскага саюзу моладзі таксама прыйшлі да помніка Леніну ў Віцебску асобнай групай. У выніку, на плошчы Леніна перавароту адна за адной адбыліся тры імпрэзы.

15-гадовы Арцём марыць пра сацыялістычную рэвалюцыю
пачакайце

No media source currently available

0:00 0:01:15 0:00

Першымі кветкі да помніка Леніну ўсклалі віцебскія БРСМаўцы. Потым побач з чырвонымі гвазьдзікамі і жоўтымі хрызантэмамі зьявіўся кошык са штучнымі кветкамі і подпісам на стужцы — «Ад віцебскіх бальшавікоў».

«Ад віцебскіх бальшавікоў»
«Ад віцебскіх бальшавікоў»

Сябры апазыцыйнай Партыі левых «Справядлівы сьвет» прынесьлі вянок і ўсклалі яго асобна — пасьля кароткай прамовы старшыні абласной партыйнай арганізацыі Мікалая Сямашкі. Ён гаварыў пра тое, што 100 год таму народы Расейскай імпэрыі атрымалі незалежнасьць і пазбавіліся ад прыгнёту.

Старыя партыйцы
Старыя партыйцы

Акцэнты ў прамовах прадстаўнікоў КПБ былі іншыя — пра тое, што галоўным дасягненьнем Кастрычніцкага перавароту стала стварэньне СССР. І што цяпер Беларусь мусіць імкнуцца адрадзіць колішнія цесныя стасункі з Расеяй.

Выступае прадстаўнік КПБ
Выступае прадстаўнік КПБ

Калі прадстаўніцтва «Справядлівага сьвету было адносна невялікім — усяго пару дзясяткаў чалавек, пераважна сталага веку, то сябры КПБ прывялі з сабой моладзь. Настаўніца сярэдняй школы № 17 прыйшла з цэлай гурмой падлеткаў, а выкладчык Міжнароднага інстытуту працоўных і сацыяльных адносінаў прывёў студэнтаў. Некаторыя з прысутных насамрэч паверылі, што моладзь прыйшла добраахвотна, і радаваліся, што «у старых камуністаў расьце зьмена».

Віцебскі дзевяціклясьнік і сталыя прыхільнікі ленінскіх ідэй
Віцебскі дзевяціклясьнік і сталыя прыхільнікі ленінскіх ідэй

Аднак шчырым пераймальнікам ленінскіх, камуністычных ідэяў усьведамляў сябе хіба толькі 15-гадовы Арцём, вучань 9-й клясы віцебскай гімназіі № 2. Для ўдзелу ва ўрачыстасьцях — а хлопец заставаўся на плошчы цягам усіх трох імпрэзаў — Арцём апрануўся «пад Леніна». Бракавала хіба толькі хрэстаматыйнай бародкі, але пазнавальны вобраз стваралі іншыя аксэсуары — кабат, кананічная «ленінская» кепка. А галоўнае — жэстыкуляцыя, знаёмая па фільмах «ленінскай» тэматыкі, зь якой хлопец прачытаў верш Міхаіла Ісакоўскага «25 кастрычніка 1917 году».

Арцём чытае верш
Арцём чытае верш

Арцём апавёў, што на мітынг прыйшоў разам з бабуляй-пэнсыянэркай. Яне не належыць ні да якой партыі, і да помніка Леніну прыйшла проста паводле старой савецкай завядзёнкі. Але ўнук хацеў бы бачыць сёньняшні дзень незвычайным, гаворыць бабуля:

«Ён хацеў разыграць сапраўдны спэктакль. Прыехаць на концы, у атачэньні рэвалюцыйных матросаў. Выступіць, як гэта рабіў Ленін. Аднак ягоныя сябры не падтрымалі такую ідэю».

На мітынгу распаўсюджвалі рукапісныя «баявыя лісткі»
На мітынгу распаўсюджвалі рукапісныя «баявыя лісткі»

Падлетак вырашыў увасобіць усё задуманае адзін: прайшоўся па горадзе да плошчы Леніна з барабанам на шыі і пад барабанны дроб. Міліцыя яго не затрымала.

Арцём з барабанам
Арцём з барабанам

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG