Да сёньняшняга абраньня яна была першай намесьніцай. Папярэдні кіраўнік Алег Трусаў займаў пасаду ад 1999 году і стаў ганаровым старшынём ТБМ.
За кандыдатуру Алены Анісім аддаддзена 87 галасоў, супраць — 2, устрымаліся — 3. Выбары прайшлі на безальтэрнатыўнай аснове, паведамляе БелаПАН.
Новаабраная кіраўніца адзначыла, што як лідэр яна «расла менавіта ў гэтай арганізацыі», як грамадзкая дзяячка — вучылася ў найлепшых прадстаўнікоў арганізацыі Алега Трусава, Генадзя Бураўкіна, Ніла Гілевіча ды іншых.
«Мая пазыцыя адносна беларускай мовы сфармаваная ўсімі сябрамі ТБМ, так будзе і далей», — падкрэсьліла яна.
Паводле Анісім, аб’яднаньне пад яе кіраўніцтвам працягне займацца дзейнасьцю па абароне моўных правоў, паколькі запісанае ў Канстытуцыі права на беларускую мову пакуль рэальна не забясьпечанае.
Магістральным напрамкам дзейнасьці будзе пашырэньне выкарыстаньня роднай мовы ў сфэры адукацыі, інфармацыі і заканадаўства.
Першым намесьнікам старшыні ТБМ абраны Ўладзімера Колас — дырэктар Беларускага гуманітарнага ліцэя імя Якуба Коласа. Пасады намесьнікаў занялі Станіслаў Суднік, Алесь Давідовіч і Дзяніс Тушынскі.
