Чарговым госьцем інтэлектуальнага клюбу «Сьвятлана Алексіевіч запрашае» стане вядомы расейскі рэжысэр Аляксандр Сакураў. Паседжаньне адбудзецца 28 кастрычніка ў Доме Кіно.
Радыё Свабода будзе весьці жывую трансьляцыю.
Аляксандра Сакурава ведаюць па фільмах «Франкафонія», «Фауст», «Аляксандра», «Сонца», «Рускі каўчэг», «Маці і сын». Усяго Сакураў зьняў больш за 50 кінастужак, як дакумэнтальных і мастацкіх. У 1995 годзе Эўрапейская акадэмія кіно ўключыла імя Аляксандра Сакурава у сьпіс ста лепшых рэжысэраў сьвету.
Сакураў вядомы сваёй грамадзянскай пазыцыяй. У сакавіку 2014 году ён выступіў з заявай, што выкарыстаньне вайсковай сілы супраць украінцаў будзе мець незваротныя наступствы для Расеі. Таксама ён заклікаў расейцаў паважаць жаданьне ўкраінцаў быць асобнай дзяржавай.
«Мы не адзін народ з украінцамі, мы розныя. У нас ўнутрана розныя культуры. Нездарма ўкраінцы заўсёды хацелі жыць асобнай дзяржавай. Так, мы блізкія, у нас ёсьць шмат падобнага, але гэта не азначае, што мы адзін народ. Гэта зусім ня так. Мы розныя і нам гэтую рознасьць трэба паважаць і шанаваць», — сказаў Сакураў.
У лютым 2017 году Аляксандр Сакураў сказаў, што расейскія палітычныя камэнтатары, а таксама супрацоўнікі расейскага тэлебачаньня і радыёвяшчаньня рана ці позна паўстануць перад Гаагскім трыбуналам, паколькі яны «зьяўляюцца правакатарамі, якія падчас пажару раскідваюцца запалкамі».
29 сакавіка 2017 году, атрымліваючы прэмію Ніка ў намінацыі «За гонар і годнасьць», Сакураў выступіў з прамовай, частка якой была прысьвечаная школьнікам і студэнтам, якія выйшлі на антыкарупцыйны пратэст у Маскве 26 сакавіка. Сакураў казаў пра неабходнасць для ўлады весьці дыялёг з маладымі людзьмі і аб недапушчальнасьці «грамадзянскай вайны» з імі, а таксама выступіў за вызваленьне асуджанага па абвінавачваньні ў терарызьме Алега Сянцова.
