Улады Шатляндыі пацьвердзілі гатоўнасьць адмяніць фізычнае пакараньне школьнікаў падчас вучобы. Шатляндыя такім чынам стане першай часткай Злучанага Каралеўства, дзе закон будзе забараняць настаўнікам фізычна караць дзяцей. Пра гэта паведамляе Бі-бі-сі.
Міністры ўраду Шатляндыі неаднаразова заяўлялі, што не падтрымліваюць бацькоў, якія выкарыстоўваюць фізычнае пакараньне ў адносінах да дзяцей, але пра заканадаўчую забарону раней не гаварылася. Адпаведны законапраект ўнёс у парлямэнт Шатляндыі дэпутат ад партыі зялёных Джон Фіні. Міністры шатляндзкага ўраду ўжо заявілі, што маюць намер ўвасабляць яго ў жыцьцё.
Паводле прапановаў Фіні, якія абмяркоўваліся ўсё лета, дзеці атрымаюць такую ж прававую абарону, як і дарослыя.
Цяпер шатляндзкія бацькі з прававога пункту гледжаньня могуць у сваё апраўданьне сказаць, што фізычны гвалт у дачыненьні да дзіцяці быў «апраўданым». Праўда, і цяпер забаронена выкарыстоўваць для фізычнага пакараньня якія-небудзь прадметы або біць дзіця па галаве. Прапанаваная ў Шатляндыі забарона адсутнічае ў заканадаўстве Англіі, Уэльсу і Паўночнай Ірляндыі, дзе бацькамі дазваляецца выкарыстоўваць «разумнае пакараньне», — адзначаецца ў публікацыі Бі-бі-сі.
