Лінкі ўнівэрсальнага доступу

У Бярозе пры невядомых абставінах памёр 23-гадовы салдат


Ілюстрацыйнае фота. Салдаты вайсковай часткі ў Печах

Пра чарговую загадкавую сьмерць у беларускім войску паведаміла газэта «Наша Ніва», якая піша пра сьмерць жыхара Барысава, які праходзіў службу ў частцы СПА ў Бярозе.

Салдат, паводле афіцыйнай інфармацыі, памёр 2 верасьня пры незразумелых абставінах і бязь сьведкаў: нібыта быў у дзяжурстве на вышцы і раптоўна сканаў, піша «Наша Ніва».

Па словах роднага брата загінулага Генадзя Сарокіна, сям’я даведалася аб сьмерці праз тэлефонны званок з вайсковай часткі. Аднак, як і ў выпадку з гісторыяй загінулага Аляксандра Коржыча, родныя не змаглі забраць цела хлопца адразу — толькі праз два дні.

— Афіцэры часткі толькі сказалі, што да брата прыяжджала хуткая, і дактары нібыта сказалі, што ў яго адарваўся тромб, ну і ўсё. Пасьля нейкі экспэрт з моргу сказаў, што ў брата былі сутаргі і прыступ эпілепсіі, бо язык прыкушаны. Але не было ў яго ніколі такога пры жыцьці! Ні сутаргаў, ні эпілепсій. Я ня веру, — гаворыць брат загінулага.

Паводле словаў маці, яе сын памёр між дзьвюма і трыма гадзінамі, а пазванілі каля пяці гадзін. Калі жанчына яго ўбачыла, то ён ляжаў у адзеньні, а на левым віску была драпіна, нос быў таксама падраны.

— Ён праляжаў жа колькі... Я не магу нават сказаць, ці былі ў яго нейкія пашкоджаньні. Бо ў моргу рэзалі, ускрывалі, усю галовачку парэзалі, грудкі парэзалі, на грудзях швы, дзе ты там ужо што ўгледзіш? Што я ўбачу? Нічога... — плача жанчына.

На дзедаўшчыну салдат скардзіўся толькі спачатку. Пасьля гэтага праблемаў, падаецца, не было.

Хаця прайшло ўжо больш за паўтара месяцы ад моманту сьмерці, афіцыйнай прычыны дагэтуль няма — у пасьведчаньні, як кажуць сваякі, напісана «прычыны сьмерці высьвятляюцца».

Генадзь Сарокін на дзяжурства заступаў на г.зв. «вышку візуальнага назіраньня» — глядзеў на неба зь біноклем. І вось у гэты момант — калі салдат быў адзін і нікога побач не было, ён нібыта і памёр — ягонае цела знайшоў саслужывец, які заступаў на пост пасьля яго.

Начальнік прэсавай службы Мінабароны Беларусі Ўладзімер Макараў пацьвердзіў Свабодзе факт сьмерці салдата ў Бярозе:

Уладзімер Макараў
Уладзімер Макараў

«Сапраўды, ёсьць зьвесткі, што 2 верасьня ў вайсковай частцы № 48684, якая дысьлякуецца ў Бярозе, памёр ваеннаслужачы. Прозьвішча мы не паведамляем. Ваеннаслужачы памёр без прыкмет гвалтоўнай сьмерці. Управа Сьледчага камітэту па Бярозаўскім раёне Брэсцкай вобласьці праводзіць праверку, прызначаная гісталягічная экспэртыза».

Ваша меркаваньне

Паказаць камэнтары

XS
SM
MD
LG