Ва Ўкраіне пачалі вывучаць беларускую мову задоўга да адпаведнай прэзыдэнцкай дамоўленасьці.
Піянэрам гэтай справы стала Ірпенская спэцыялізаваная агульнаадукацыйная школа з вывучэньнем замежных моў. Яе ва Ўкраіне ведаюць яшчэ як Школу лінгвістыкі.
Беларускую мову тут выкладаюць ужо 12 гадоў. Пакуль — факультатыўна, але з часам плянуюць вывучаць зь першай клясы. Цяпер факультатыў наведваюць 12 вучняў. Хоць прайшло яшчэ няшмат заняткаў, у кожнага зь іх ужо ёсьць сваё ўлюбёнае беларускае слова — «аблокі», «сонейка», «чаўнок».
Для настаўніцы Ганны Ткачэнкі, якая і сама яшчэ навучаецца ў Кіеўскім нацыянальным унівэрсытэце імя Шаўчэнкі, выкладаньне беларускай мовы ў школе — таксама першы досьвед. І ёй гэта падабаецца. Праграму навучаньня для васьмігадовых украінцаў яна распрацавала сама на аснове перададзеных беларускім пасольствам падручнікаў.
Здымачная група Радыё Свабода наведала ўрок беларускай мовы для ўкраінскіх вучняў.
