Злучаныя Штаты з 31 сьнежня выходзяць з UNESCO, спэцыялізаванай установы ААН у пытаньнях адукацыі, навукі і культуры. Пра гэта паведаміў Дзярждэпартамэнт ЗША.
«Гэтае рашэньне было няпроста прыняць. Яно адлюстроўвае занепакоенасьць ЗША з нагоды росту запазычанасьці UNESCO, неабходнасьці фундамэнтальных рэформаў у арганізацыі і працягу антыізраільскай перадузятасьці ў UNESCO», — гаворыцца ў заяве.
Пры гэтым Дзярждэпартамэнт дадаў, што ЗША працягнуць узаемадзеяньне з арганізацыяй на правах дзяржавы-назіральніка, каб дзяліцца сваімі поглядамі і вопытам.
Кіраўніцтва UNESCO ўжо выказала шкадаваньне ў сувязі з выхадам Злучаных Штатаў з арганізацыі.
