Старшыня Парлямэнцкай асамблеі Рады Эўропы Пэдра Аграмун падаў у адстаўку на фоне падазрэньняў, што некаторыя члены ПАРЭ атрымлівалі хабар ад уладаў Азэрбайджану, і скаргаў на яго пасьля таго, як ён зьезьдзіў у Сырыю з дэпутатамі расейскай Дзярждумы.
Пра гэта паведамляе ВВС.
З заклікам да адстаўкі Аграмуна раней выступілі члены ПАРЭ з самых розных краін Эўропы.
У сьнежні праваабарончая арганізацыя Эўрапейская ініцыятыва стабільнасьці (ESI) апублікавала даклад, у якім сьцьвярджалася, што некаторыя члены ПАРЭ займаліся палітычным лабіраваньнем інтарэсаў Азэрбайджану і што некаторыя зь іх атрымлівалі плату ад азэрбайджанскіх уладаў.
У сакавіку генэральны сакратар Рады Эўропы Турб’ёрн Ягланд папрасіў прэзыдэнта ПАРЭ Пэдра Аграмуна «неадкладна сфармаваць незалежную камісію для расьсьледаваньня».
Гэтую просьбу падтрымалі і многія члены ПАРЭ, якія заявілі, што «сур’ёзныя і пераканаўчыя абвінавачваньні ў непрыстойнай паводзінах» пагражаюць цэласнасьці асамблеі.
Праваабаронцы вінавацяць улады Азэрбайджану ў падаўленьні апазыцыі, незаконных арыштах і парушуэньні свабоды слова. Азэрбайджанскі бок абвяргае гэтыя абвінавачваньні.
Акрамя таго, Аграмуна крытыкавалі за тое, што разам з расейскімі дэпутатамі ў сакавіку сёлета ён езьдзіў у Сырыю і сустракаўся з Башарам Асадам, якога рэгулярна крытыкуюць за парушэньні правоў жыхароў краіны, а таксама абвінавачвалі ў выкарыстаньні хімічнай зброі.
У заяве сацыялістычнай групы ў ПАРЭ гаварылася: «Нават калі візыт быў „асабістым і прыватным“, ні ў якім выпадку імя Парлямэнцкай Асамблеі ня можа быць ўцягнутае ў ініцыятывы, якія можна аб’ектыўна ўспрымаць як падтрымку рэжыму Асада і яго дзеяньняў супраць сырыйскага насельніцтва».
Пасаду Аграмуна часова зойме брытанскі дэпутат Роджэр Гейл.
