Лінкі ўнівэрсальнага доступу

Упершыню за часы незалежнасьці Беларусь наведае брытанскі міністар


Элан Данкан

25-26 верасьня брытанскі міністар эўрапейскіх справаў Элан Данкан наведае Беларусь.

Сэр Элан Данкан, міністар у справах Эўропы і Амэрыкі, будзе першым міністрам брытанскага ўраду, які наведае Беларусь за ўсе гады яе незалежнасьці. Візыт адбываецца з нагоды 25-годзьдзя дыпляматычных дачыненьняў паміж Вялікабрытаніяй і Беларусьсю.

Падчас свайго візыту міністар сустрэнецца з прэзыдэнтам Аляксандрам Лукашэнкам і міністрам замежных справаў Уладзімерам Макеем. Ён таксама пагаворыць з палітычнымі лідэрамі і прадстаўнікамі грамадзянскай супольнасьці.

Візыт міністра дазволіць абедзьвюм краінам умацаваць дачыненьні і разьвіць супрацоўніцтва ў справе ўмацаваньня бясьпекі і зьмяншэньня напружаньня ў рэгіёне, адзначаецца ў паведамленьні на сайце брытанскага ўраду.

Напярэдадні візыту міністар Данкан сказаў: «Будучы першым міністрам, які наведвае Беларусь ад часу абвяшчэньня незалежнасьці, я спадзяюся на далейшае ўмацаваньне нашых дачыненьняў і шлю мае найцяплейшыя прывітаньні народу Беларусі.

Беларусь разьмешчаная ў геаграфічным сэрцы Эўропы і адыгрывае важную ролю ў рэгіёне і за яго межамі. Я спадзяюся на плённыя дыскусіі з прэзыдэнтам Лукашэнкам і міністрам замежных справаў Макеем.

Мы таксама абмяркуем бягучыя эканамічныя, юрыдычныя і выбарчыя рэформы, якія паспрыяюць працьвітаньню і дэмакратыі ў Беларусі.

Я шчыра спадзяюся, што гэты візыт падрыхтуе глебу для больш плённых дачыненьняў у будучыні на аснове узаемнай павагі і разуменьня».

Ваша меркаваньне

Паказаць камэнтары

XS
SM
MD
LG