Лінкі ўнівэрсальнага доступу

«Дахаты» — дзяржаўныя СМІ паведамляюць пра вывад расейскіх войск зь Беларусі


Пра ўрачыстыя провады Першай танкавай арміі, якая прымала ўдзел у вучэньнях Захад-2017, піша інфармацыйнае агенцтва БЕЛТА.

«Мы адзіны народ, адзіная гісторыя, адзіны лёс. Вучэньні паказалі, што мы баявыя, мы саюзьнікі з агульнай гісторыяй, агульным разуменьнем задач. Самае галоўнае — мы працуем над тым, каб бясьпека нашых дзяржаў была непарушная», — так разьвітваўся зь Беларусьсю намесьнік камандуючага першай гвардзейскай Чырвонасьцяжнай танкавай арміі УС Расеі Аляксандр Мінакоў.

Міністэрства абароны РБ запэўніла, што ўсе расейскія падразьдзелы і тэхніка, якія былі задзейнічаныя ў сумесных вучэньнях Захад-2017, пакінуць Беларусь да 30 верасьня 2017 году.

У першы дзень вучэньняў 14 верасьня міністэрства абароны Расеі паведаміла, што падразьдзяленьні Заходняй вайсковай акругі, якiя прыцягваюцца да сумеснага стратэгічнага вучэньня «Захад-2017», пачалі перакідку асабовага складу, узбраеньня, вайсковай і спэцыяльнай тэхнікі на палігоны ў Беларусь.

Праз некалькі гадзінаў Міністэрства абароны Беларусі гэтую інфармацыю зьняпраўдзіла. Прадстаўнік ведамства Ўладзімер Макараў заявіў Радыё Свабода: «Я толькі пацьвярджаю, што вайскоўцы, заплянаваныя для ўдзелу ў вучэньнях на тэрыторыі Беларусі, а менавіта зь дзесяці тысяч удзельнікаў тры тысячы — гэта вайскоўцы Ўзброеных сілаў РФ. Усе іхныя падразьдзяленьні і ўвесь іхны асабовы склад знаходзіцца на тэрыторыі Беларусі і прыступіў да адпрацоўкі вучэбных задачаў у рамках вучэньняў. Іншых расейскіх падразьдзяленьняў на вучэньнях на тэрыторыі Беларусі ня будзе. Што да адпрацоўкі пытаньняў у рамках вучэньняў, то гэта без рэальнай перагрупоўкі на тэрыторыю РБ. Гэта адназначна».

Наконт інфармацыі, якую разьмясьціла міністэрства абароны Расеі, ён сказаў; «Дзеля бога. Ніякай рэальнай перагрупоўкі расейскіх войскаў на тэрыторыю Беларусі ня будзе». У прэсавай службе міністэрства абароны Расеі карэспандэнту Свабоды ня сталі камэнтаваць сытуацыю.

Першая гвардзейская танкавая армія была сфармаваная ў Заходняй ваеннай акрузе Расеі ў 2016 годзе. Паведамлялася, што на яе ўзбраеньні знаходзяцца баявыя танкі Т-72Б3, Т-80, БПМ-2, і звыш 130 найменьняў іншай баявой тэхнікі.

Ваша меркаваньне

Паказаць камэнтары

XS
SM
MD
LG