Лінкі ўнівэрсальнага доступу

Рабочыя ваўкавыскага «Спэцмантажу» восем месяцаў без заробкаў


Ваўкавыск

Больш як 30 работнікаў ААТ «Ваўкавыскспэцмантаж» на працягу васьмі месяцаў не атрымлівалі заробку. І толькі праз суд ім удалося дамагчыся выплаты 42 тысяч рублёў кампэнсацыі.

Кіраўніцтва ААТ «Ваўкавыскспэцмантаж» са студзеня месяца не плаціла заробкі сваім рабочым, нягледзячы на тое, што штодня яны выходзілі на працу і выконвалі канкрэтныя заданьні. Як сьцьвярджаюць самі рабочыя, гучалі абяцанкі, але рэальных выплат заробку так і не было.

У вас ва ўсіх ёсьць бацькі на вёсцы, сала вам заўсёды на жыцьцё дадуць.

— У вас ва ўсіх ёсьць бацькі на вёсцы, сала вам заўсёды на жыцьцё дадуць, — гучала з вуснаў кіраўніцтва.

Як высьветлілася пазьней, кіраўніцтва «Ваўкавыскспэцмантаж» цалкам закрэдытавала прадпрыемства; першы паверх офісу, які знаходзіцца ў цэнтры горада, прадалі. У выніку прадпрыемства апынулася на мяжы банкруцтва. Дырэктар звольніўся, заснавальнік знайшоў сабе працу, пакінуўшы калектыў на волю лёсу.

Падманутыя людзі зьвярнуліся ў рэспубліканскі камітэт Беларускага прафсаюзу работнікаў энэргетыкі, газавай і паліўнай прамысловасьці. Дзякуючы адмыслоўцам прафсаюзу справа дайшла да суду. Суд вынес рашэньне на карысьць рабочых.

Прадпрыемства практычна прыпыніла сваю дзейнасьць, засталіся толькі 12 чалавек, „Ваўкавыскспэцмантаж“ на 90% прызналі банкротам.

«Цяпер прадпрыемства практычна прыпыніла сваю дзейнасьць, — расказаў Свабодзе былы прафсаюзны лідэр Аляксандар Папкоў, — засталіся толькі 12 чалавек, „Ваўкавыскспэцмантаж“ на 90% прызналі банкротам, распрадаецца маёмасьць з тым, каб выплаціць даўгі па заробках і крэдытах».

Спадар Папкоў кажа, што цяжка нават прыгадваць, як давялося жыць усе гэтыя месяцы, калі людзі не атрымлівалі заробку: «Усе грошы, якія траплялі на рахунак прадпрыемства, заснавальнік аддаваў за крэдыты, на заробкі не заставалася ні капейкі. У бухгальтэрыю прыходзілі жонкі рабочых зь дзецьмі, прасілі хоць нешта заплаціць, а там толькі разводзілі рукамі, маўляў, няма сродкаў і ўсё».

Аляксандар Папкоў гаворыць, што хадзіў па дапамогу да ўладаў у райвыканкам, але там таксама паставіліся да іх праблемы абыякава.

Каб хоць 1% акцый прадпрыемства належаў дзяржаве, то мы б прымалі нейкія захады, а так прадпрыемства цалкам прыватнае, то і разьбірацца вам самім.

«Мне сказалі ў аддзеле працы, што, маўляў, каб хоць 1% акцый прадпрыемства належаў дзяржаве, то мы б прымалі нейкія захады, а так прадпрыемства цалкам прыватнае, то і разьбірацца вам самім».

Спадар Папкоў кажа, што большасьць звольненых рабочых дагэтуль не працаўладкаваліся, бо ў Ваўкавыску няма працы.

«Некаторым удалося ўладкавацца то ў качагарку, то яшчэ недзе, нехта езьдзіць нават у калгасы на працу, але большасьць сталай працы ня маюць. Мы яшчэ дамагаемся, каб павыплочвалі запазычанасьць па заробках, як вырашыў суд, бо ня ўсе яшчэ атрымалі».

Ваша меркаваньне

Паказаць камэнтары

XS
SM
MD
LG