На заклік найбуйнейшага францускага прафсаюзу CGT у краіне праходзіць каля 200 маніфэстацыяў, 4 000 папярэджаньняў пра страйкі абвешчаныя амаль ва ўсіх галінах эканомікі. Пра гэта паведамляе Radio France Internationale.
Папярэджаньні пра забастоўкі абвешчаныя на транспарце, на прадпрыемствах энэргетычнага сэктару, у нафтавай галіне, у СМІ, а таксама ў дзяржаўных і навучальных установах.
Нацыянальная чыгуначная кампанія SNCF паведаміла, што ў парыскім рэгіёне рух прыгарадных цягнікоў у гэты аўторак забясьпечаны толькі на 50-80%.
Дэталі новай рэформы працоўнага заканадаўства былі абвешчаныя 31 жніўня. Зь меркаваньняў хуткасьці і эфэктыўнасьці прэзыдэнт вырашыў зьмяніць Працоўны кодэкс не законам, які павінен прайсьці абмеркаваньне ў парлямэнце, а ўказамі ўраду.
Рэформа Макрона прадугледжвае далейшую лібэралізацыю рынку працы. Новыя меры павялічваюць колькасьць пытаньняў, якія будуць рэгулявацца не законам, а калектыўнымі дамовамі на прадпрыемствах і ў галінах эканомікі. Мэта рэформы — зрабіць рынак працы больш гнуткім, каб дамагчыся зьніжэньня хранічна высокага беспрацоўя, якое складае 9,5% працаздольнага насельніцтва (пры сярэднеэўрапейскім паказчыку 7,8%).
Праціўнікі рэформы працоўнага заканадаўства лічаць, што зьмены не прывядуць да стварэньня вялікай колькасьці новых працоўных месцаў, а толькі ўзмоцняць нестабільнасьць на рынку працы.
Паводле апошніх апытаньняў да 57% французаў падтрымліваюць страйк, абвешчаны 12 верасьня.