Лінкі ўнівэрсальнага доступу

Палякі прапусьцілі Саакашвілі празь мяжу з Украінай


Прыхільнікі Міхэіла Саакашвілі, якія чакаюць яго ва Ўкраіне.

Польскія памежнікі на пункце пропуску «Шэгіні» прапусьцілі на тэрыторыю Украіны Міхэіла Саакашвілі, былога прэзыдэнта Грузіі і кіраўніка Адэскай вообласьці, пазбаўленага ўкраінскага грамадзянства.

У той жа час, як паведамляецца ў трансьляцыі з месца здарэньня, пункт пропуску з украінскага боку пакуль не працуе. Шэраг СМІ паведамляюць пра прысутнасьць вайскоўцаў і пра тое, што пераход замінаваны.

Раней Саакашвілі спрабаваў праехаць ва Ўкраіну цягніком. Ён пакінуў цягнік пасьля таго, як той быў спынены на польскай тэрыторыі на патрабаваньне ўкраінскіх уладаў.

Цягнік павінен быў адправіцца ў 14:07 кіеўскага часу, аднак кіраўнікі дзяржаўнай кампаніі «Укрзалізниця», паводле Саакашвілі, забаранілі рух да таго часу, пакуль ён не пакіне цягнік. Праз гучную сувязь паведамілі, што згодна з інфармацыяй, якая паступіла ад нацыянальнай паліцыі Ўкраіны, у цягніку знаходзiцца асоба, якой забаронены ўезд на тэрыторыю Ўкраіны, таму цягнік ня можа пачаць рух, пакуль гэты чалавек там застаецца.

Міхэіл Саакашвілі з сынам Нікалозам у цягніку
Міхэіл Саакашвілі з сынам Нікалозам у цягніку

Дэпутат Вярхоўнай Рады Ўкраіны Юры Дзеравянка, які суправаджае Саакашвілі, назваў «злачынным» загад украінскіх уладаў аб забароне руху цягніка, у якім знаходзіцца экс-прэзыдэнт Грузіі.

Тымчасам прэс-служба ўкраінскай паліцыі паведаміла, што каля пункту пропуску «Кракавец» затрыманыя больш за сто чалавек у камуфляжнай форме, якія рухаліся ў бок ўкраінска-польскай мяжы. У іх сканфіскавалі газавыя балёнчыкі, стартавы пісталет, а таксама мэталічныя прадметы.

Прыхільнікі Саакашвілі заяўлялі, што будуць сустракаць свайго лідэра на мяжы. Сярод іх могуць быць і народныя дэпутаты, якія маюць статус недатыкальнасьці.

Праціўнікі Саакашвілі заяўляюць, што ягоныя заявы і дзеяньні правакацыйныя. Памежнікі нагадалі, што каля дзяржаўнай мяжы рэжымная зона, і заклікалі ўсе бакі да стрыманасьці.

26 ліпеня прэзыдэнт Пятро Парашэнка сваім указам пазбавіў Міхэіла Саакашвілі ўкраінскага грамадзянства.

Паведамлялася, што міністэрства юстыцыі Грузіі спадзяецца на выдачу Саакашвілі пасьля яго вяртаньня ва Ўкраіну.

Ваша меркаваньне

Паказаць камэнтары

XS
SM
MD
LG