Напярэдадні слуханьняў 6 верасьня ў прэсе зьявіліся фатаграфіі, якія сьведчаць аб сустрэчах асоб, абвінавачаных у спробе дэстабілізацыі Чарнагорыі. На гэтых здымках фігуруюць Шышмакоў, Папоў, а таксама грамадзянін Сэрбіі Аляксандр Сынджэліч. Ён здаўся чарнагорскім уладам неўзабаве пасьля правалу апэрацыі і атрымаў статус сьведкі, якая супрацоўнічае са сьледзтвам.
Адзін з ключавых абвінавачаных Братыслаў Дыкіч адхіліў у судзе прадʼяўленыя яму абвінавачваньні ў тэрарызьме і стварэньні злачыннай арганізацыі.
Дыкіч — грамадзянін Сэрбіі і былы камандзір сэрбскай жандармэрыі. Яго арыштавалі на тэрыторыі Чарнагорыі разам зь 19 іншымі асобамі непасрэдна перад парлямэнцкімі выбарамі 16 кастрычніка 2016. Па вэрсіі сьледзтва, змоўшчыкі плянавалі захапіць парлямэнт і забіць прэмʼер-міністра Міла Джуканавіча пры садзейнічаньні расейскіх структур.
Дыкіч назваў абвінавачваньні ў яго адрас «выдумкай» і паведаміў суду, што не ведаў пра існаваньне арганізацыі, якая зьбіралася гвалтоўным шляхам скінуць уладу. Паводле яго слоў, ён прыяжджаў у Чарнагорыю, каб наведаць манастыр, а не для ўдзелу ў якіх-небудзь акцыях.
Іншы фігурант гэтай справы — прадстаўнік прарасейскага апазыцыйнага «Дэмакратычнага фронту» Мілан Княжэвіч. Ён заявіў, што падасьць запыт на вяртаньне яму і ягонаму калегу Андрыі Мандзічу канфіскаваных раней пашпартоў для таго, каб яны змаглі наведаць Расею па запрашэньні кіраўніцтва партыі «Адзіная Расея». Княжэвіч і Мандзіч маюць рэгулярныя кантакты з расейскай кіруючай партыяй. Яны сёньня таксама паўсталі перад чарнагорскім судом па абвінавачваньні ў спробе захопу ўлады. Падазраваныя адмаўляюць усе абвінавачваньні.
