Ужо 13 гадоў Украіна адзначае на дзяржаўным узроўні гэты дзень, зьвязаны з падзеяй 23 жніўня 1991, калі група дэпутатаў напярэдадні абвяшчэньня незалежнасьці Ўкраіны ўнесла сіне-жоўты сьцяг у залю парлямэнту.
Разам з прэзыдэнтам Украіны Пятром Парашэнкам сьцяг над Сафійскай плошчай ўзнімалі і пяць вызваліцеляў Данбасу — палкоўнік Давід Чубінашвілі, маёр Яўген Коваль, капітан Раман Скробак, лейтэнант Тарас Кучма і старшына Кірыл Шчукін. Выступаючы на цырымоніі, Парашэнка сказаў, што «расейскіх акупантаў ад украінскага сьцяга калоціць, як чарцей ад ладану», і прывёў у прыклад учынак крымчаніна Ўладзіміра Балуха, якога 4 жніўня раённы суд у анэксаваным Расеяй Крыме прысудзіў да трох гадоў і сямі месяцаў калёніі.
«Яны кінулі за краты Ўладзіміра Балуха — за тое, што ён на ўкраінскай зямлі ў Крыме, над сваім домам, вывесіў сьцяг Украіны», — падкрэсьліў Парашэнка і запэўніў, што «і Ўладзімір, і ўкраінскі Крым будуць свабоднымі ад Расеі і яе зялёных чалавечкаў».
З нагоды сьвята ўлады Кіева арганізавалі некалькі канцэртаў і фэстываляў, а ўвечары на Сафійскай плошчы актывісты грамадзкіх арганізацыяў разгорнуць найвялікшы ў сьвеце сьцяг Украіны.
У рамках урачыстых захадаў Парашэнка адкрыў выставу ўзбраеньня і вайсковай тэхнікі «Сіла непакорных» на Храшчаціку. У экспазыцыі 67 адзінак, у тым ліку ракетныя комплексы С-300 ПС, «Кропка-У», танк «Апора», самаходныя артылерыйскія ўстаноўкі, баявыя машыны пяхоты, бронетранспартэры, грузавыя і санітарныя аўтамабілі. Паказаная на выставе тэхніка пасьля сьвяткавання 26-й гадавіны Незалежнасьці Ўкраіны, якая будзе адзначацца 24 жніўня, адправіцца на пазыцыі ўкраінскіх вайскоўцаў у Данбасе.