Лінкі ўнівэрсальнага доступу

У мінабароны Польшчы асьцерагаюцца, што ня ўсе сілы і сродкі будуць выведзеныя Расеяй зь Беларусі пасьля вучэньняў


Ілюстрацыйнае фота

Намесьнік міністра абароны Польшчы Міхал Дворчык заявіў журналістам пра існаваньне асьцярогі, што Расея ня выведзе войскі зь Беларусі пасьля вучэньняў «Захад-2017» у верасьні.

«Ёсьць шмат сумневаў і боязі, што пасьля вучэньняў» Захад-2017 «можа высьветліцца, што ня ўсе сілы і сродкі будуць выведзеныя Расеяй зь Беларусі», — цытуе Дворчыка РІА Навіны.

Ён адзначыў, што за вучэньнямі «Захад-2017» будуць уважліва назіраць як польскія спэцслужбы, так і спэцслужбы заходніх краінаў.

«У нас няма стоадсоткавай упэўненасьці ў тым, якія сілы будуць выкарыстаныя. Таму што ўжо цяпер ёсьць шмат перадумоў, каб лічыць, што гэта не такія сілы, якія заяўляюць расейцы і беларусы, а большыя», — дадаў намесьнік міністра.

У той жа час Дворчык падкрэсьліў, што жыхары Польшчы могуць адчуваць сябе «абсалютна бясьпечна».

Раней прэс-сакратар МЗС Беларусі Дзьмітры Мірончык заяўляў, што будуць накіраваныя запрашэньні назіраць за вайсковымі вучэньнямі «Захад-2017» прадстаўнікам замежных краінаў і міжнародных арганізацый. Паводле яго, плянуецца запрасіць вайсковых назіральнікаў з Латвіі, Літвы, Польшчы, Украіны, Эстоніі, Швэцыі, Нарвэгіі.

Мірончык адзначыў, што дзяржавы — удзельнікі АБСЭ, у тым ліку Беларусь, не абавязаныя запрашаць назіральнікаў на вучэньні такога маштабу, у якіх задзейнічана менш за 13 тысяч вайскоўцаў.

«У той жа час, кіруючыся прынцыпам празрыстасьці і дзейнічаючы па добрай волі, наша краіна ў ініцыятыўным парадку накіроўвае запрашэньні для ўдзелу ў назіраньні за актыўнай фазай вучэньняў прадстаўнікам міжнародных арганізацый (ААН, АБСЭ, NATO, АДКБ, СНД). Мы запросім і ваенных аташэ замежных краінаў, акрэдытаваных пры амбасадах у Беларусі», — сказаў ён.

Генэральны сакратар NATO Енс Столтэнбэрг 13 ліпеня на прэс-канфэрэнцыі па выніках пасяджэньня Рады Расея — NATO ў Брусэлі заявіў, што ў вучэньнях прыме ўдзел больш сіл, чым заяўлена афіцыйна.

«Цяпер занадта рана штосьці казаць, таму што вучэньняў яшчэ не было. Мяркуючы па вопыце папярэдніх вучэньняў, у нас ёсьць усе падставы меркаваць, што будзе задзейнічана больш сілаў, чым афіцыйна заяўлена цяпер», — сказаў ён.

XS
SM
MD
LG