Паводле дадзеных на 21 жніўня, плошча пажару на тэрыторыі Палескага прыроднага запаведніку з украінскага боку перавышае 120 гектараў, паведамляе агенцтва УНІАН. Адлегласьць да мяжы з Рэспублікай Беларусь — ня болей за 1,5 кілямэтра.
Узгараньне ляснога масіву ў Капішчанскім лясьніцтве на тэрыторыі запаведніку адбылося па абедзе 20 жніўня.
Як заявілі ў Дзяржаўнай службе надзвычайных сытуацый Украіны, з дапамогай верталётаў праведзена выведка месца надзвычайнай сытуацыі і працягваецца тушэньне пажару на асобных участках. Пажарныя робяць усё, каб утрымаць агонь і не дапусьціць яго распаўсюджаньне за межы пэрымэтру. Аднак максымальна задзейнічаць авіяцыю замінае моцны вецер.
«Адчуваюцца моцныя парывы ветру паўночна-заходняга кірунку, што не дае магчымасьці пажарнай авіяцыі падняцца ў паветра», — гаворыцца ў паведамленьні прэсавай службы ведамства.
На ліквідацыю наступстваў ляснога пажару прыцягнута калі дзьвюх сотняў спэцыялістаў і амаль паўсотні адзінак тэхнікі.