Лінкі ўнівэрсальнага доступу

Ва Ўзбэкістане забаранілі вясельныя торты і вальсы


Прэзыдэнт Узбэкістану Шаўкат Мірзіяеў раскрытыкаваў правядзеньне пышных вясельляў у сваёй краіне. Пасьля гэтага шматлікія рэстарацыі, якія займаюцца правядзеньнем вясельных урачыстасьцяў, былі вымушаныя адмовіцца ад многіх «эўрапейскіх паслугаў».

— Перадусім рэстарацыі адмовіліся ад эўрапейскіх нумароў у выкананьні нашых танцораў. Гэтыя танцоры працуюць у дзяржаўных ансамблях. Вось ужо два месяцы яны не атрымліваюць заробкаў, вясельлі дапамагалі ім хоць неяк выжыць. Але цяпер нашых танцораў і гэтай радасьці пазбавілі, — кажа ў інтэрвію ўзбэцкай рэдакцыі Радыё Свабода ташкенцкі харэограф Цімур.

Пасьля заяваў прэзыдэнта аб неабходнасьці скасаваньня пышных вясельных цырымоніяў пацярпелі ня толькі мясцовыя танцавальныя групы. У апошнія гады на узбэцкіх вясельлях стала модна паказваць гасьцям міні-фільм з гісторыяй каханьня маладых. У размове са Свабодай прадстаўнік групы, якая займаецца здымкамі міні-фільмаў Love Story, кажа, што пасьля заяваў Мірзіяева каля дзесяці кліентаў адмянілі свае заказы.

Вясельнае застольле ва Ўзбэкістане
Вясельнае застольле ва Ўзбэкістане

У Інтэрнэт быў выкладзены рэкамэндаваны парадак правядзеньня вясельляў і іншых сямейных урачыстасьцяў ва Ўзбэкістане. Не рэкамэндуецца вальс жаніха і нявесты, сумеснае разразаньне торта, кіданьне букета, а таксама паказ міні-фільмаў Love Story. Акрамя таго, колькасьць гасьцей не павінна перавышаць 200-300 чалавек, не павiнна быць гучнай музыкі, легкавыя машыны толькі для жаніха і нявесты.

Узбэцкія ўлады ня першы год спрабуюць узяць пад кантроль правядзеньне вясельляў. Аднак жыхары краіны працягваюць ладзіць раскошныя вясельлі.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG