Лінкі ўнівэрсальнага доступу

Sunday Times: Лізавета II не адмовіцца ад трону дзеля свайго сына Чарльза


Брытанская каралева Лізавета ІІ

Абавязак перад нацыяй для каралевы стаіць на першым месцы, піша Sunday Times. Са спасылкай на свае крыніцы, блізкія да каралеўскага двара, нядзельная газэта абвяргае чуткі пра тое, што каралева, якой у красавіку споўніўся 91 год, плянуе сысьці ад спраў і перадаць кіраваньне свайму старэйшаму сыну прынцу Чарльзу.

«Як паведамілі Sunday Times тры розныя высокапастаўленыя крыніцы, ні Букінгемскі палац, ні Кларэнс-хаус [афіцыйная рэзыдэнцыя прынца Чарльза] ня маюць плянаў у дачыненьні да рэгенцтва», — піша газета.

Афіцыйныя асобы ў Букінгемскім палацы нагадалі Sunday Times пра абяцаньне, якое дала каралева народу ў свой 21-ы дзень нараджэньня: «Я абвяшчаю ... што ўсё маё жыцьцё, ці апынецца яно доўгім або кароткім, будзе прысьвечана служэньню вам».

Паводле Акту аб рэгенцтве 1937 года, манарх можа перадаць уладу свайму законнаму спадкаемцу ў выпадку сваёй непрацаздольнасьці па хваробе, што будзе пісьмова пацьверджана трыма ці больш даверанымі асобамі каралевы, старшынём палаты лордаў, сьпікерам палаты абшчын і кіраўніком дзяржаўных архіваў.

Апошні раз рэгенцтва ў Брытаніі існавала ў пэрыяд з 1811 па 1820 гады, калі ў выніку душэўнай хваробы кароль Георг III ня змог кіраваць краінай, і ўлада перайшла яго старэйшаму сыну Георгу, прызначанаму прынцам-рэгентам. Пазьней ён стаў каралём Георгам IV.

XS
SM
MD
LG