The New York Times паведамляе, што знос далейшых помнікаў і статуй заплянаваны ўладамі ў дзесяці далейшых штатах.
Прапануем вам пазнаёміцца са сьпісам амэрыканскіх гарадоў, у якім адбыліся такія зносы і дэмантажы пасьля гвалтоўных выступаў ультраправых у горадзе Шарлотсвілі (штат Вірджынія) 12 жніўня, калі ўлады абвясьцілі аб намеры зьнесьці помнік генэралу Робэрту Лі, камандзіру войскаў Канфэдэрацыі (помнік у Шарлотсвілі ў выніку ня быў разабраны).
Балтымар (штат Мэрылэнд) — 4 статуі.
Дарэм (штат Паўночная Караліна) — адзіны горад, дзе помнік канфэдэратам быў зьнесены ня ўладамі, а пратэстоўцамі.
Гэйнсвіл (штат Флорыда) — помнік канфэдэратам з цэнтру гораду перанесены на могілкі за горадам.
Новы Арлеан (штат Люізіяна) — зьнесеныя 4 помнікі.
Остын (штат Тэхас) — статуя прэзыдэнта Канфэдэрацыі Джэфэрсана Дэйвіса перанесеная ў іншае месца яшчэ ў 2015 годзе.
Бруклін (Нью-Ёрк) — дэмантаваныя дзьве табліцы ў гонар Робэрта Лі.
Лёс-Анджэлес (Каліфорнія) — зьняты ўказальнік.
Люізьвіль (штат Кентакі) — зьнесена статуя канфэдэрацкага салдата.
Арланда (штат Флорыда) — статуя канфэдэрацкага салдата перанесеная з публічнага парку на могілкі.
Сан-Дыега (штат Каліфорнія) — дэмантаваная табліца ў гонар Джэфэрсана Дэйвіса.
Сэнт-Люіс (штат Мізуры) — дэмантаваны помнік канфэдэратам у гарадзкім парку.
Сэнт-Пітэрсбург (штат Флорыда) — дэмантаваная табліца ў гонар Стоўнўала Джэксана, генэрала Канфэдэрацыі.
