Кітай выказаў «глыбокую незадаволенасьць» праз тое, што вайсковы карабель ЗША прайшоў міма аднаго з пабудаваных Пэкінам штучных астравоў у стратэгічным Паўднёва-Кітайскім моры. Гэты манэўр амэрыканцы зрабілі ў межах апэрацыі ВМС ЗША па забесьпячэньні свабоды суднаходзтва.
Афіцыйны прадстаўнік МЗС КНР Гэн Шуан заявіў, што гэты крок з боку ЗША падрывае сувэрэнітэт Кітаю і ставіць пад пагрозу бясьпеку перадавых сіл з абодвух бакоў.
Кітай прад’яўляе правы амаль на ўсё Паўднёва-Кітайскае мора. Ён рэгулярна пратэстуе супраць апэрацыяў, якія адміністрацыя прэзыдэнта Трампа працягвае збольшага з мэтай супакоіць хаўрусьнікаў, якія вядуць тэрытарыяльныя спрэчкі з Пэкінам.
Прадстаўнік ВМС у інтэрвію Associated Press паведаміў, што эсьмінец «Джон С. Маккейн» прайшоў міма рыфа Місчыф у чацьвер, але не дадаў падрабязнасьцяў.
Гэн Шуан заявіў, што кітайскія ваенна-марскія сілы «ідэнтыфікавалі амэрыканскае ваеннае судна, далі яму папярэджаньне і вымусілі яго пакінуць раён здарэньня».
