Дэль Понтэ паведаміла швайцарскай газэце Blick, што ўжо напісала заяву аб адстаўцы.
Паводле яе словаў, камісія «абсалютна нічога ня робіць», у той час як у Сырыі ўсе на баку зла. «Урад Башара Асада здзяйсьняў жудасныя злачынствы супраць чалавечнасьці і ўжываў хімічную зброю. А апазыцыя цяпер складаецца з экстрэмістаў», — дадала яна.
Дэль Понтэ і іншыя сябры камісіі неаднаразова заклікалі Савет Бясьпекі накіраваць сырыйскую справу ў Міжнародны крымінальны суд.
Карла дэль Понтэ ў другой палове 1990-х гадоў займала пасаду генэральнага пракурора Швайцарыі і ўдзельнічала ў расьсьледаваньні карупцыйных скандалаў у Крамлі. Пазьней яна была галоўным пракурорам Міжнароднага трыбуналу па былой Югаславіі, а таксама трыбуналу па Руандзе. У камісіі ААН па расьсьледаваньні парушэньняў правоў чалавека ў Сырыі яна прапрацавала амаль пяць гадоў.
У выніку вайны ў Сырыі загінулі ўжо больш за 300 тысяч чалавек, мільёны сталі ўцекачамі.
