Лінкі ўнівэрсальнага доступу

Амэрыканскі канал HBO здыме дакумэнтальны фільм пра Чарнобыль


Ілюстрацыйнае фота

Кабэльная і спадарожнікавая тэлевізійная сетка HBO супольна са Sky Television анансавала 5-сэрыйны дакумэнтальны міні-сэрыял, прысьвечаны катастрофе на Чарнобыльскай АЭС. Пакуль праект фігуруе пад простай назвай «Чарнобыль».

Як перадае Variety, «Чарнобыль» будзе прысьвечаны «навукоўцам і ўсім астатнім, хто ахвяраваў сабой, каб уратаваць сьвет ад яшчэ большай катастрофы». Фільмаваць пачнуць увесну 2018 году ў Літве.

Брытанскі актор Джарэд Гарыс, вядомы з сэрыялаў «Вар’яты» (Mad Men) і «Грань» (Fringe), выканае ролю маскоўскага навукоўца Валерыя Лягасава, які дасьледаваў наступствы аварыі, прапаноўваў шляхі яе ліквідацыі і настаяў на эвакуацыі мястэчка Прыпяць, а праз два гады па аварыі і за дзень да абвяшчэньня вынікаў расьсьледаваньня аб прычынах аварыі быў знойдзены павешаным.

Сцэнар піша Крэйг Мэйзын, апошняя значная праца якога — «Беласьнежка і паляўнічы — 2» (The Huntsman: Winter’s War). Рэжысэрам прызначаны швэд Ёган Рэнк («Стака Бо»), вядомы з эпізодаў сэрыялаў «Разысьціся ва ўсю» (Breaking Bad) і «Хадзячыя мярцы» (The Walking Dead), але больш — з музычных кліпаў, у тым ліку з 10-хвіліннага «Blackstar» Дэйвіда Боўі.

«З таго моманту, як Крэйг Мэйзын аказаў нам гісторыю, мы былі перакананыя, што гэтую ажно занадта рэальную гісторыю жаху і выкупленьня неабходна распавесьці, — заявіў Кэры Антоліс, прэзыдэнт аддзелу міні-сэрыялаў HBO. — Яна будзе зацягваць — і абураць — нашых гледачоў і аўдыторыю па ўсім сьвеце.

HBO вядомы сэрыяй дакумэнтальных фільмаў «Таямнічая Амэрыка» (America Undercover), якая здымаецца ад 1983 году і адзін з эпізодаў якой намінаваўся на «Оскара», і дакумэнтальнымі стужкамі пра самыя розныя падзеі — ад жорсткага абыходжаньня са сланамі ў цырках да ратаваньня габрэйскіх дзяцей ад сьмерці ў нацысцкай Нямеччыне. Яшчэ больш вядомыя мастацкія сэрыялы каналу, напрыклад, «Гульня тронаў» (Game of Thrones), «Сьвет Дзікага Захаду» (Westworld) або «Клан Сапрана» (The Sopranos).

Ваша меркаваньне

Паказаць камэнтары

XS
SM
MD
LG