Лінкі ўнівэрсальнага доступу

ЗША вядуць перамовы з Брытаніяй пра гандлёвае пагадненьне пасьля Брэксыту


Адміністрацыя прэзыдэнта ЗША Дональда Трампа вядзе перамовы аб буйным гандлёвым пагадненьні зь Вялікабрытаніяй пасьля таго, як яна выйдзе з Эўразьвязу. Пра гэта Трамп распавёў у інтэрвію The Wall Street Jornal.

Паводле амэрыканскага прэзыдэнта, у Вашынгтон ужо прыяжджаў міністар міжнароднага гандлю Брытаніі Ліям Фокс. Ён сустрэўся з адміністрацыяй Белага дому і распачаў перамовы па гандлёвай дамове. Гандлёвае пагадненьне будзе ўключаць у сябе шырокі спэктар эканомікі. Трамп таксама асудзіў кіраўніцтва ЭЗ за тое, што яно нібыта перашкаджае Брытаніі пакінуць адзіную Эўропу. Прэзыдэнт ЗША назваў чыноўнікаў Брусэлю «вялікімі пратэкцыяністамі».

Перамовы аб выхадзе Вялікабрытаніі з ЭЗ пачаліся 19 чэрвеня ў Брусэлі. Яны працягнуцца да канца 2018 году. Пасьля гэтага бакам даецца шэсьць месяцаў на ратыфікацыю дамоўленасьцяў у нацыянальных парлямэнтах. Чарговы раўнд перамоваў заплянаваны на канец жніўня. На ім, як чакаецца, нададуць асаблівую ўвагу правам грамадзянаў Брытаніі і ЭЗ пасьля Брэксыту, мяжы паміж Паўночнай Ірляндыяй і Рэспублікай Ірляндыя, якая ўваходзіць у Эўразьвяз. Будзе таксама прынятае рашэньне аб фінансавых кампэнсацыях з боку Лёндану за тое, што Злучанае Каралеўства пакідае адзіную Эўропу.

Брытанія настойвае на абмеркаваньні дамовы аб свабодным гандлі з ЭЗ, але ў Брусэлі ня маюць намеру абмяркоўваць гандлёвае супрацоўніцтва да тых часоў, пакуль не атрымаюць ясных адказаў на першыя тры пытаньні.

Ваша меркаваньне

Паказаць камэнтары

XS
SM
MD
LG