У кляштары пры Парафіі Сьвятой Троіцы ў мястэчку Друя Браслаўскага раёна пройдзе міжнародны мастацкі пленэр. У ім прымуць удзел 40 прафэсійных мастакоў зь Беларусі і замежжа. З нагоды 500-годзьдзя першай друкаванай кнігі Францішка Скарыны сёлетні пленэр прысьвяцілі беларускаму першадрукару.
Сёньня ў Друі адкрываецца трэці міжнародны пленэр, перадае catholic.by. 40 мастакоў цягам тыдня будуць жыць у кляштары на беразе Заходняй Дзьвіны. У наступную нядзелю пройдзе вэрнісаж, дзе мастакі прадставяць свае працы.
Ініцыятар пленэру — пробашч касьцёлу Сьвятой Троіцы Сяргей Сурыновіч. Як летась пісала Свабода, сам ксёндз лічыць пленэр самым галоўным мастацкім мерапрыемствам Браслаўшчыны.
«Сам я раней займаўся жывапісам. Але цяпер мала часу, каб пісаць самому, таму мы вырашылі арганізоўваць мастацкі пленэр», — расказваў год таму Сурыновіч Свабодзе.
Сёлетні пленэр Сурыновіч называе «Скарынэрам», бо мерапрыемства прысьвечана 500-годзьдзю першай друкаванай кнігі Францішка Скарыны. З гэтай нагоды ў кляштары падрыхтавалі экспазыцыю ў гонар першадрукара.