Паводле зьвестак сьледзтва, злачынная групоўка ад 2009-га да 2015 году ўчыніла 6 выкраданьняў і забойстваў. Злачынцы імкнуліся завалодаць жытлом сваіх ахвяраў. Выкрылі групоўку ў 2015 годзе, калі адпрацоўваліся захады пошуку зьніклых бязь вестак.
Групоўка падшуквала людзей з сацыяльна ўразьлівай катэгорыі насельніцтва. Зламысьнікі ўгаворвалі ўладальніка кватэры прадаць яе. Пасьля былога гаспадара заваблівалі ў бязьлюднае месца і забівалі. Целы закопвалі ў загадзя падрыхтаваных магілах.
На могілках вобласьці было выяўлена шэсьць пахаваньняў і яшчэ тры падрыхтаваныя магілы для наступных ахвяраў. У ходзе допытаў абвінавачаныя не выключалі, што закопвалі людзей жывымі, бо яны былі пад узьдзеяньнем кляфіліну.
Сямёну Беражнову і Ігару Гершанкову пракурор запрасіў найвышэйшую меру пакараньня. Для Тацяны Гершанковай — 24 гады турмы, а для Барыса Калесьнікава — 22.
Сямёну Беражнову, Ігару і Тацяне Гершанковым выстаўленае абвінавачваньне ва ўчыненьні забойстваў і падрыхтоўцы да ўчыненьня забойства, а таксама ў выкраданьні чалавека і падрыхтоўцы да выкраданьня. Акрамя таго, яны абвінавачваюцца ў махлярстве, разбоі, вымаганьні, выкраданьні альбо зьнішчэньні дакумэнтаў. Гершанковы абвінавачваюцца яшчэ ў незаконным абарачэньні наркатычных рэчываў.
Яшчэ адзін фігурант Барыс Калесьнікаў абвінавачваецца ў разбоі, дапамозе ў забойстве, а таксама выкраданьні чалавека.
У сваім апошнім слове абвінавачаныя пакаяліся і выбачаліся перад родзічамі забітых імі людзей. Беражноў і Гершанкоў прасілі суд разгледзіць магчымасьць замены расстрэлу на максымальны тэрмін турэмнага пакараньня.
