«За слабы кантроль за аб’ектамі гісторыка-культурнай спадчыны прыцягнуты да дысцыплінарнай адказнасьці міністар культуры Барыс Сьвятлоў», — паведамляецца на сайце ведамства.
Паводле пракуратуры, «для стварэньня належных умоваў захаванасьці, аднаўленьня, утрыманьня і выкарыстаньня гісторыка-культурных каштоўнасьцяў вызначаны парадак адлічэньняў за прадпрымальніцкую дзейнасьць і выплаты кампэнсацый за шкоду, прычыненую такім каштоўнасьцям». Адлічэньні неабходна ажыцьцяўляць штогод ад прыбытку кампаній, якія арандуюць памяшканьні ў гістарычных будынках.
Нярэдка на фасадах і дахах будынкаў-помнікаў усталёўваюць выцяжкі, прамысловыя кандыцыянэры, прылады электрасувязі.
Як выявіла праверка, адлічэньні мелі адзінкавы характар і не былі зьвязаныя з рэалізацыяй нормаў заканадаўства.
Для ліквідацыі парушэньняў Генпракуратура накіравала адпаведную інфармацыю ў Савет Міністраў, у Міністэрства культуры ўнесеная прапазыцыя.
Вызначаны суб’екты гаспадараньня, дзейнасьць якіх аказвае непасрэднае ўзьдзеяньне на аб’екты гісторыі і культуры — усяго такіх больш за 2 тысячы.
Штрафныя санкцыі пракуратуры далі магчымасьць накіраваць на аднаўленьне помнікаў гісторыка-культурнай спадчыны звыш 400 тысяч рублёў. У параўнаньні зь мінулым годам аб’ём сродкаў павялічыўся ў 16 разоў.
Сродкі, у прыватнасьці, накіраваныя на фінансаваньне капітальнага рамонту Барысаглебскай (Калоскай) царквы ў Горадні, кансэрвацыю Княскай вежы Крэўскага замку і рэстаўрацыю фрэскавых росьпісаў XII стагодзьдзя Спаса-Праабражэнскай царквы ў Полацку.
Раней паведамлялася, што сродкі на гэтыя аб’екты выдаткаваныя з прэзыдэнцкага фонду.