Раён Дамаску, дзе разьмешчаная амбасада Расеі, апынуўся пад абстрэлам 16 ліпеня, паведаміла сырыйскае дзяржаўнае інфармагенцтва SANA. Паводле гэтых дадзеных, адзін са снарадаў трапіў у комплекс будынкаў дыпляматычнага прадстаўніцтва і нанёс яму шкоду, яшчэ адзін разарваўся побач з амбасадай.
Паводле дадзеных SANA, сем чалавек былі траўмаваныя ў выніку абстрэлу ў жылым раёне непадалёк ад месца разьмяшчэньня амбасады Расеі.
Ні адзін з бакоў канфлікту ў Сырыі ня ўзяў на сябе адказнасьць за абстрэл. Паўстанцы, што змагаюцца з рэжымам прэзыдэнта Башара Асада, які падтрымлівае Масква, раней ужо цалялі ў амбасаду Расеі.
Назіральная арганізацыя «Сырыйская абсэрваторыя па правах чалавека», якая базуецца ў Вялікай Брытаніі, 16 ліпеня заявіла, што ў шасьцігадовай грамадзянскай вайне загінулі больш за 330 000 чалавек, сярод іх 99 тысяч 617 цывільных.
