Брытанскі міністар у пытаньнях выхаду з ЭЗ Дэвід Дэйвіс і ягоны эўрапейскі калега Мішэль Барні пачынаюць 17 ліпеня ў Брусэлі чатырохдзённыя перамовы аб урэгуляваньні ўмоў выхаду Злучанага каралеўства з аб’яднаньня. Бакі маюць менш за два гады, каб урэгуляваць умовы для брытанскага выхаду з ЭЗ, які адбудзецца 30 сакавіка 2019-га незалежна ад таго, будзе заключанае адпаведнае пагадненьне ці не.
Абодва ўдзельнікі перамоваў мелі нефармальную сустрэчу ў мінулым месяцы. Чакаецца, што новы круг дыскусій будзе больш напружаным, з многімі складанымі пытаньнямі, якія падлягаюць вырашэньню, уключаючы правы грамадзян ЭЗ у Вялікай Брытаніі і брытанскіх грамадзян у Эўразьвязе.
У Брытаніі жывуць каля трох мільёнаў грамадзян краінаў ЭЗ, каля 1,5 мільёна брытанцаў знаходзяцца ў 27 краінах ЭЗ. Да Brexit большасьць грамадзян ЭЗ маюць свабоду перамяшчэньня, што дазваляе ім жыць і працаваць у дзяржавах — сябрах аб’яднаньня без абмежаваньняў.
Вялікая Брытанія павінна выйсьці з Эўразьвязу да канца сакавіка 2019 году пасьля рэфэрэндуму 2016-га, нязначная большасьць удзельнікаў якога прагаласавалі за гэты выхад. 29 сакавіка прэм’ер-міністарка Вялікай Брытаніі Тэрэза Мэй пачала працэс выхаду з ЭЗ згодна з артыкулам 50 Лісабонскай дамовы пра функцыянаваньне Эўрапейскага зьвязу, якая прадугледжвае працэдуры такога выхаду. Гэты працэс павінен доўжыцца ня больш за два гады.
