Лінкі ўнівэрсальнага доступу

Былы старшыня Бабруйскага гарвыканкаму Андрэй Каваленка асуджаны на 8 гадоў калёніі


Андрэй Каваленка, архіўнае фота

14 ліпеня Бабруйскі гарадзкі суд вынес вырак па справе былога старшыні Бабруйскага гарвыканкаму Андрэя Каваленкі. Яго пакаралі васьмю гадамі калёніі ўзмоцненага рэжыму з канфіскацыяй маёмасьці. Пасьля адбыцьця пакараньня Каваленку забаронена займаць кіроўныя пасады цягам пяці гадоў.

Былога старшыню Бабруйскага гарвыканкаму Каваленку абвінавацілі ў хабарніцтве. Яго затрымалі ў лістападзе мінулага году ў момант перадачы хабару. Чыноўніку інкрымінавалі больш за дзесяць эпізодаў з агульнай сумай хабару ў больш за 20 тысяч даляраў за вырашэньне пытаньняў на карысьць пэўных камэрцыйных структур ці за прызначэньні на пасады.

Падчас арышту Каваленка прадаў свой аўтамабіль і часткова (на 21 000 рублёў) кампэнсаваў дзяржаве незаконныя даходы.

Судовы працэс цягнуўся 12 дзён. Каваленка раскаяўся, факты хабарніцтва прызнаў часткова. Пракурор прасіў 8 гадоў калёніі ўзмоцненага рэжыму з канфіскацыяй маёмасьці. Адвакат настойвала, што некаторыя факты не даказаныя і прасіла мінімальны тэрмін. Яна заявіла, што будзе абскарджваць вынесены прысуд.

Андрэй Каваленка з адвакаткай
Андрэй Каваленка з адвакаткай

Старшынём Бабруйскага гарвыканкаму Каваленка стаў у 2014 годзе, да таго быў намесьнікам старшыні, старшынём Кастрычніцкага райвыканкаму Магілёва, займаў іншыя кіроўныя пасады.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG