Лінкі ўнівэрсальнага доступу

У Кангрэс унесеная прапанова аб імпічмэнце прэзыдэнта Трампа


Сябра Палаты прадстаўнікоў Кангрэсу ЗША Брэд Шэрман

Сябра Палаты прадстаўнікоў Кангрэсу ЗША дэмакрат ад Каліфорніі Брэд Шэрман унёс у сераду ў Кангрэс прапанову аб імпічмэнце прэзыдэнта Трампа.

Брэд Шэрман тлумачыць сваё патрабаваньне тым, што Дональд Трамп дапусьціў найцяжэйшае парушэньне закону, а менавіта перашкодзіў ажыцьцяўленьню правасудзьдзя, адправіўшы ў адстаўку дырэктара ФБР Комі, які быў куратарам расьсьледаваньня «расейскага сьледу» ў леташняй перадвыбарчай кампаніі.

Кангрэсмэн спасылаецца на словы звольненага дырэктара ФБР, які заявіў, што прэзыдэнт дамагаўся ад яго спыненьня расьсьледаваньня кантактаў свайго былога памочніка ў нацыянальнай бясьпецы Майкла Фліна з расейскімі прадстаўнікамі.

Гэта першая фармальная заканадаўчая ініцыятыва з патрабаваньнем аб датэрміновым спыненьні паўнамоцтваў Трампа. Сёньня яе падтрымліваюць толькі два кангрэсмэны. Кіраўніцтва дэмакратаў ня ўпэўненае ў своечасовасьці такога кроку, паколькі за прапанову аб імпічмэнце павінна прагаласаваць большасьць чальцоў ніжняй палаты, а ў рэспубліканцаў сёньня там перавага ў 46 галасоў. У якасьці альтэрнатывы апазыцыя прапануе Кангрэсу заснаваць незалежную камісію і даручыць ёй высьветліць, ці мела месца падчас прэзыдэнцкай гонкі змова паміж камандай Трампа і Крамлём.

Намесьніца прэс-сакратара Белага дома Сара Гакабі-Сандэрс ахарактарызавала прапанову каліфарнійскага дэмакрата як «форменнае глупства і палітыканства ў найгоршым выглядзе».

Сара Гакабі-Сандэрс
Сара Гакабі-Сандэрс

Ваша меркаваньне

Паказаць камэнтары

XS
SM
MD
LG