Лінкі ўнівэрсальнага доступу

Дэлегаты ПА АБСЭ бяруць удзел у Форуме грамадзянскай супольнасьці ў Менску. Беларускія ўлады — не


Напярэдадні штогадовай сэсіі Парлямэнцкай Асамблеі АБСЭ, якая распачне працу ў Менску 5 ліпеня, прадстаўнікі беларускіх няўрадавых арганізацый ладзяць «Паралельны форум грамадзянскай супольнасьці».

Арганізатарамі форуму выступаюць шэраг грамадзкіх праваабарончых арганізацый, у тым ліку «Вясна», Беларускі Хэльсынскі камітэт, Беларуская асацыяцыя журналістаў ды іншыя. Заяўленая тэма для абмеркаваньня — «Шэсьць гадоў пасьля дакладу АБСЭ аб сытуацыі з правамі чалавека ў Беларусі: што зьмянілася?».

На імпрэзу сабраліся прадстаўнікі беларускай грамадзянскай супольнасьці з 60 НДА, супрацоўнікі дыпляматычных прадстаўніцтваў у Беларусі, госьці зь Бюро дэмакратычных інстытутаў і правоў чалавека АБСЭ, чальцы Парлямэнцкай Асамблеі АБСЭ.

Мэта арганізатараў — давесьці ўдзельнікам сэсіі ПА АБСЭ альтэрнатыўную інфармацыю пра становішча з грамадзка-палітычнымі правамі ў Беларусі. Пра гэта перад пачаткам пасяджэньня Свабодзе паведаміў старшыня праваабарончага цэнтру «Вясна» Алесь Бяляцкі:

«Наша задача — выказаць крайнюю занепакоенасьць сытуацыяй з грамадзка-палітычнымі правамі ў Беларусі. Улады падаюць свой варыянт сытуацыі становішча фундамэнтальных сацыяльных і грамадзка-палітычных правоў у Беларусі. Таму напярэдадні сэсіі мы сабраліся, каб дэпутаты Парлямэнцкай Асамблеі АБСЭ пачулі голас грамадзянскай супольнасьці».

Адкрываючы форум, мадэратар Сяргей Мацкевіч паведаміў, што да супрацы былі запрошаныя прадстаўнікі ўладаў Беларусі, аднак ніводзін з чыноўнікаў такой магчымасьцю не скарыстаўся.

Тым часам усіх удзельнікаў прывітаў спэцдакладчык ААН у пытаньнях правоў чалавека ў Беларусі Міклаш Харасьці.

«Прымаючы ўдзел у дыскусіі, як дарадца па правах чалавека Бюро дэмакратычных інстытутаў і правоў чалавека АБСЭ, ЗША Браян Грыфі, у прыватнасьці, адзначыў: «У нас выклікаюць жах некаторыя падзеі, якія адбываюцца ў Беларусі. У прыватнасьці, веснавыя падзеі — перасьлед і штрафы, якія зьведалі многія». Паводле Браяна Грыфі, гэтая сытуацыя застаецца прадметам абмеркаваньня структурамі АБСЭ.

Удзельнікі форуму маюць прыняць рэзалюцыю, скіраваную да ўдзельнікаў ПА АБСЭ.

Ваша меркаваньне

Паказаць камэнтары

XS
SM
MD
LG