Лінкі ўнівэрсальнага доступу

«Ня хочацца сьвяціцца ад радыяцыі» — гомельскія пэнсіянэры зарабляюць на жыцьцё продажам ягад


Чарніц цяпер ня так багата на рынках Гомеля, але прыгожыя лясныя ягады ўжо зьявіліся на гандлёвых радах.

Шасьцідзесяцігадовая жыхарка абласнога цэнтру, якая назвалася Тацянай Мікалаеўнай, першай прывезла чарніцы на міні-рынак на вуліцу Кожара. За двухсотграмовую шклянку ягад просіць 2 рублі.

«Сёлета значна меней чарніц, чым нават летась. І драбнейшыя яны. У траўні ж замаразкі былі. Сады прыхапіла, і чарніцам, відаць, дасталася — ягаднікі таксама ў той час цьвілі. Зьбірала ў лесе каля чыгуначнага прыпынку „Лісічкі“ — гэта ў бок Чарнігаву».

Кабета кажа, што гадзін каля шасьці хадзіла па лесе, пакуль сабрала 5-літровае вядзерца. Змушаная зьбіраць нават дробныя чарніцы і везьці на рынак, бо «пэнсію яшчэ доўга чакаць — яна ў сярэдзіне месяца».

«Дый якая тая пэнсія — 250 рублёў, — жаліцца Тацяна. — Я дыспэтчарам працавала ў „Гомельаблаўтатрансе“, аднесьлі нас да катэгорыі служачых і вызначылі такую пэнсію. Пакуль яе дачакаюся, то, можа, хоць на хлеб ды малако зараблю на ягадах».

Сама Тацяна Мікалаеўна і яе суседка па гандлёвым прылаўку нахвальваюць чарніцы: яны, маўляў, для зроку карысныя, страваваньня, сардэчна-судзіннай сыстэмы.

Пагаджаюся з агаворкаю: «Гэта калі чарніцы без радыяцыі».

«Я правярала, 32 адзінкі, а норма — 185», — даводзіць зьбіральніца ягад.

Чарніцы зь лябараторным цэтлікам
Чарніцы зь лябараторным цэтлікам

У цэтліку лябараторыі міні-рынку «Аэрадром», якая адносіцца да гарадзкой вэтэрынарнай станцыі, сапраўды напісана: «Норма 185 Бк/кг». Правільна напісаць: дапушчальны ўзровень 185 бэкерэляў на кіляграм, а ня норма. Іначай выглядае, што радыяцыі нібыта бракуе ў чарніцах.

На Прывакзальным рынку ляснымі ягадамі гандлюе вясковец Анатоль зь вёскі Краўцоўка. Ягады ў яго таньнейшыя: за шклянку — 1 рубель 50 капеек.

Ён ня хоча паказваць цэтлік праверкі чарніц на радыяцыю, нават злуецца: «А навошта? Сказалі, што норма».

Вясковец таксама ходзіць у лес, каб мець нейкую прыбаўку да пэнсіі. Яна ў Анатоля нават меншая — усяго 200 рублёў. Суразмоўца працаваў у камбінаце «Сож» дэзінфэктарам.

«Такое ў нас жыцьцё, — даводзіць вясковец, — хоць некаторыя й лічаць, што пэнсіянэрам жывецца лепей».

На Цэнтральным рынку чарніцы прадаюць у трох месцах. Кошт ва ўсіх аднолькавы: шклянка — 2 рублі. Многія пакупнікі падыходзяць, пытаюцца пра кошт і сыходзяць. Дорага.

І чарніцы, і клубніцы
І чарніцы, і клубніцы

Гараджанін Пётар прадае з жонкаю і клубніцы, і чарніцы:

«Сабралі ў лесе за вёскаю Прыбар, праверылі на радыяцыю, можна прадаваць. Людзі бяруць на варэнікі альбо проста паласавацца. Кошт, можа, і высакаваты, але ж чарніц у лесе мала. Гэта, лічыце, першыя. Будзе больш чарніц, кошты зьнізяцца — такі закон рынку».

За тры дзесяцігодзьдзі пасьля Чарнобылю жыхары рэгіёну больш абачліва пачалі ставіцца да ягад і грыбоў. Прынамсі, на рынках імкнуцца не купляць «дары лесу», не правераныя ў лябараторыі.

«Мне чарніцы падабаюцца, — кажа гараджанін Ігар. — Калі бачу, што правераныя, купляю. Не правераныя не бяру, каб не „сьвяціцца“ ад радыяцыі. У нас усё-ткі шмат месцаў, дзе й хадзіць ня варта, а ня толькі нешта зьбіраць да стала».

Ваша меркаваньне

Паказаць камэнтары

XS
SM
MD
LG