Лінкі ўнівэрсальнага доступу

Супраць актывіста апазыцыі спынілі справу за распаўсюд друкаваных матэрыялаў


Каардынатар руху «За свабоду» па Гарадзенскай вобласьці Вадзім Лявон, архіўнае фота

Яшчэ ў сакавіку на яго быў складзены адпаведны пратакол.

Тады справа Вадзіма Лявона набыла дэтэктыўны характар. Раённая газэта паведаміла, што яго нібыта затрымлівалі за тое, што незаконна займаўся самагонаварэньнем. Але пазьней высьветлілася, што ў доме ягоных бацькоў рабілі ператрус і знайшлі цэлы архіў «незаконнай друкаванай прадукцыі». Усё гэта адбывалася напярэдадні 25 сакавіка.

Кіраўнік руху «За свабоду» Юрась Губарэвіч паведаміў Свабодзе, што тады ў Вадзіма Лявона канфіскавалі папросту старыя ўлёткі, плякаты, кнігі, якія насамрэч ніякай небясьпекі ні для кога ня несьлі.

Юрась Губарэвіч
Юрась Губарэвіч

— Зразумела, што тады гэта была толькі прычына, каб зьбіць актыўнасьць напярэдадні 25 сакавіка. А зь Лявона яшчэ і пазьдзекаваліся, бо прыехалі ў вёску да ягоных бацькоў шукаць нібыта самагон, пазабіралі ягоныя архіўныя паперы. Экспэртызы канфіскаваных папераў, зразумела, ніхто не рабіў, і вось цяпер усю гэтую справу спынілі, хоць ад пачатку было зразумела, што ніякага крыміналу няма. Зрэшты, што казаць пра адміністрацыйную справу, калі заведзеныя крымінальныя справы цяпер таксама спыняюць...

Сам Вадзім Лявон сказаў Свабодзе, што нават ня ведае прычыны, па якой ягоная справа закрытая, паколькі ніякай афіцыйнай паперы яму на рукі не далі.

— Мне аддалі мой архіў, які недзе ляжаў у вадзе, усе паперы мокрыя, і самі сказалі, што ніхто яго нават не глядзеў. Зразумела, што ўсё гэта ня што іншае, як беззаконьне. Тады яны захацелі прыехалі і забралі архіў, склалі пратакол, што я нібыта распаўсюджваў незаконна друкаваную прадукцыю і нават не паглядзелі, што ў ёй. Зразумела, што і перад любымі іншымі акцыямі ўсё можа паўтарыцца і ніякія скаргі на гэтыя дзеяньні органаў праварадку ня дзейнічаюць. У мяне проста няма словаў, каб гэта яшчэ нейкім чынам камэнтаваць — прававое бязьмежжа.

Ваша меркаваньне

Паказаць камэнтары

XS
SM
MD
LG