Прадпрымальнікі занепакоеныя тым, што прэм’ерка настроена ў першую чаргу на зьмену міграцыйнай палітыкі, а не на абарону эканамічных інтарэсаў краіны — напярэдадні саміту ЭЗ, які адкрываецца 22 чэрвеня ў Бруселі.
З прычыны таго, што на датэрміновых парлямэнцкіх выбарах 8 чэрвеня кіруючая Кансэрватыўная партыя Вялікай Брытаніі страціла большасьць у Палаце абшчын, яе лідэр Мэй, як мяркуюць аглядальнікі, вымушана зьмякчыць сваю пазыцыю і адмовіцца ад так званага жорсткага Брэксыту, пры якім краіна выходзіць з агульнага эўрапейскага рынку і мытнага саюзу.
У падрыхтаванай ўрадам троннай прамове каралевы Лізаветы Другой, якая адкрыла ў сераду першую сэсію парлямэнту новага скліканьня, гаворыцца пра законапраекты, якія дазволяць Вялікай Брытаніі самастойна вызначаць міграцыйную, мытную і гандлёвую палітыку, а таксама палітыку ў галіне санкцый. У прамове таксама нічога не гаварылася аб раней абвешчаных прэм’ер-міністаркай плянах правесьці рэформы ў галіне сацыяльнага забесьпячэньня, адукацыі і карпаратыўнага кіраваньня, якія зазналі рэзкую крытыку ў брытанскім грамадзтве.
Цяпер дэпутаты парлямэнту павінны зацьвердзіць абвешчаную каралевай праграму на галасаваньні, прызначаным на 22 чэрвеня.