Колькасьць ахвяраў пажару ў шматпавярховым доме ў Лёндане ўзрасла да 58. Каля 20 чалавек застаюцца ў шпіталях.
Напярэдадні афіцыйна пацьвярджалася гібель 30 чалавек.
У суботу паліцыя брытанскай сталіцы паведаміла, што сярод амаль 70 зьніклых бязь вестак 28 загінулі. Улады не выключаюць, што лічба будзе мяняцца.
Раней у той жа дзень паведамлялася пра закрыцьцё дзьвюх лініяў мэтро ў непасрэднай блізкасьці ад месца пажару. Пажарныя асьцерагаюцца бязладнага падзеньня фрагмэнтаў згарэлага 24-павярховага дома.
Прэмʼер-міністар Тэрэза Мэй у пятніцу сустрэлася з жыхарамі заходніх раёнаў Лёндану, якія стыхійна выйшлі на вуліцы з патрабаваньнем неадкладна дапамагчы людзям, якія пазбавіліся прытулку. Яна паабяцала вылучыць на экстранную дапамогу каля 6 з паловай мільёнаў даляраў.
