Лінкі ўнівэрсальнага доступу

Сьледчы камітэт нэгатыўна ўспрыняў «інфармацыйныя баталіі» вакол справы Даната Скакуна


Сьледчы камітэт заявіў, што некаторыя СМІ распаўсюджваюць пра справу Даната Скакуна недакладную інфармацыю, якая мае вельмі далёкія адносіны да самой крымінальнай справы і доказнага матэрыялу.

«Складаецца ўражаньне, што хтосьці наўмысна дэзынфармуе грамадзкасьць, уводзячы яе ў зман. Са свайго боку мы разумеем, што адсутнасьць поўнай інфармацыі пра крымінальную справу запаўняецца рознага роду чуткамі, прыватнымі меркаваньнямі, няслушнымі высновамі і здагадкамі», — сказалі БелТА ў Сьледчым камітэце.

У Сьледчым камітэце заявілі пра сваю адкрытасьць для СМІ і грамадзкасьці. І выказалі нэгатыўнае стаўленьне да інфармацыйных баталій вакол крымінальнай справы Даната Скакуна.

Дата разгляду справы ў апэляцыйным парадку ў Вярхоўным судзе пакуль не прызначана, паведаміла ў фэйсбуку прэсавы сакратар Вярхоўнага суду Юлія Ляскова. У Сьледчым камітэце заклікалі СМІ і грамадзкасьць устрымацца ад розных заяў да заканчэньня судовага працэсу. Там запэўніваюць, што ўся інфармацыя па справе будзе прадстаўлена пасьля ўступленьня прысуду ў сілу.

У Менскім гарадзкім судзе 7 красавіка абвешчаны прысуд гімназісту Данату Скакуну ў справе аб нападзе на настаўніцу. Непаўналетні Данат прызнаны вінаватым у замаху на забойства з асаблівай жорсткасьцю. Суд прысудзіў яго да пазбаўленьня волі на 8 гадоў. Працэс быў закрытым.

У сацыяльных сетках створаны старонкі падтрымкі Даната Скакуна.

Ваша меркаваньне

Паказаць камэнтары

XS
SM
MD
LG