Акружны адміністрацыйны суд Кіева часткова задаволіў хадайніцтва дзьвюх грамадзкіх арганізацый — «Антыфашысцкая праваабарончая ліга» і «Габрэйская праваабарончая група», якія патрабавалі прызнаць незаконнымі дзеяньні Кіеўскай гарадзкой рады ў перайменаваньні імем Рамана Шухевіча праспэкту імя генэрала Ватуціна.
У прыватнасьці, суд забараніў Кіеўскай гарадзкой радзе перадаваць на подпіс мэру сталіцы Віталю Клічко і публікаваць рашэньне пра перайменаваньне праспэкту.
Згодна з нацыянальным заканадаўствам Украіны, Кіеўская гарадзкая рада можа аспрэчыць гэтае рашэньне ў судовым парадку.
Кіеўская гарадзкая рада на паседжаньні 1 чэрвеня пры падтрымцы 69 дэпутатаў ухваліла рашэньне перайменаваць праспэкт імем Рамана Шухевіча. Заля сустрэла такія вынікі галасаваньня аплядысмэнтамі ды лёзунгамі «Слава Украіне — Героям слава!». На пасяджэньні прысутнічаў сын Шухевіча — народны дэпутат Украіны Юры Шухевіч, які падзякаваў кіеўскім дэпутатам за такое рашэньне.
Першая спроба назваць праспэкт імем Героя Ўкраіны Рамана Шухевіча адбылася няўдала ў сьнежні 2016 году. Тады адпаведную прапанову не падтрымала фракцыя «Салідарнасьць» (партыі ўкраінскага прэзыдэнта Пятра Парашэнкі).
