Лінкі ўнівэрсальнага доступу

Сэнатары ЗША дамовіліся наконт законапраекту аб узмацненьні санкцыяў супраць Расеі


Сэнатары ЗША 12 чэрвеня абвясьцілі пра двупартыйнае пагадненьне аб законапраекце, які прадугледжвае новыя санкцыі супраць Расеі за яе ўмяшаньне ў прэзыдэнцкія выбары ў ЗША, у той жа час заканадаўча замацоўваючы і цяперашнія санкцыі за агрэсію Расеі ва Ўкраіне.

Дэмакраты і рэспубліканцы з камітэту міжнародных адносінаў і банкаўскага камітэту пагадзіліся з папраўкай, якая будзе дадавацца да законапраекту аб санкцыях у дачыненьні Ірану, які таксама накладзе на Расею новыя санкцыі за парушэньні правоў чалавека і прадастаўленьне зброі ўраду прэзыдэнта Сырыі Башара аль-Асада.

Што да санкцыяў, зьвязаных з выбарамі, то яны будуць тычыцца «асобаў, якія ажыцьцяўляюць зламысную кібэрактыўнасьць ад імя ўраду Расеі», гаворыцца ў кароткім тлумачэньні да законапраекту.

Двупартыйная папраўка таксама прадугледжвае прымяненьне існых санкцый, уведзеных у адпаведнасьці з прэзыдэнцкім указам, пры ўмове, што Кангрэс зможа разгледзець і патэнцыйна заблякаваць любыя спробы Белага дома зьмякчыць такія санкцыі ў дачыненьні Расеі.

«Кадыфікуючы існыя санкцыі і патрабуючы ад Кангрэсу перагляду любога рашэньня аслабіць або ўзмацніць іх, мы гарантуем, што Злучаныя Штаты будуць працягваць караць прэзыдэнта Ўладзіміра Пуціна за ягоныя безразважныя і дэстабілізуючыя дзеяньні», — сказаў лідэр дэмакратаў у Сэнаце Чак Шумэр. Ён дадаў, што новыя санкцыі таксама адправяць Расеі ад Вашынгтону «магутную і двупартыйную заяву».

Чакаецца, што галасаваньне наконт папраўкі адбудзецца разам з галасаваньнем пра законапраект аб санкцыях у дачыненьні Ірану ўжо на гэтым тыдні.

ЗША, Эўрапейскі саюз ды іншыя краіны «Групы сямі» скаардынавана наклалі санкцыі ў дачыненьні да шэрагу зьвязаных з уладай Расеі фізычных і юрыдычных асобаў, а таксама да некаторых сэктараў расейскай эканомікі некалькімі пакетамі. Дзеяньне гэтых санкцыяў пэрыядычна падаўжаюць праз агрэсію Масквы супраць Украіны ў Крыме і на частцы Данбасу.

Лідэры краінаў «Групы сямі» на саміце ў канцы траўня таксама выказалі гатоўнасьць увесьці новыя санкцыі ў дачыненьні да Расеі, калі яна і ў далейшым не будзе выконваць сваіх абавязаньняў наконт Украіны згодна зь менскімі дамоўленасьцямі.

Ваша меркаваньне

Паказаць камэнтары

XS
SM
MD
LG