Брытанская паліцыя 8 чэрвеня правяла ператрусы ў мусульманскім фітнэс-клюбе Ummah Fitness, разьмешчаным на ўсходзе Лёндану, у раёне Ілфард, паведамляе "Нямецкая хваля".
Пра гэта паведамляе газэта The Times у пятніцу, 9 чэрвеня. Ператрусы прайшлі ў межах расьсьледаваньня тэракту ў Лёндане, калі трое тэрарыстаў наехалі на людзей на Лёнданскім мосце. Як піша выданьне, у ілфардзкім фітнэс-клюбе маглі праходзіць баявую падрыхтоўку джыгадысты.
У Ummah Fitness займаліся, у прыватнасьці, двое з трох лёнданскіх тэрарыстаў: 27-гадовы брытанец пакістанскага паходжаньня Хур Бат і 22-гадовы італьянец мараканскага паходжаньня Юсэф Загба.
Як высьветліла выданьне The Times, у паліцыю паступалі зьвесткі аб магчымай падрыхтоўцы джыгадыстаў у ілфардзкім фітнэс-клюбе яшчэ ў 2015 годзе. Асьцярогі з нагоды таго, што адбываецца ў спартовай залі, выказвалі нават прадстаўнікі тамтэйшага мячэту, адзначае The Financial Times.
