Лінкі ўнівэрсальнага доступу

Віцебскія прадпрымальнікі зладзілі фотавыставу, каб сабраць грошы для выпускнікоў школы-інтэрнату


Фотавыстава

Выстава атрымала назву «На парозе дарослага жыцьця», а «фотамадэлямі» сталі выхаванцы Сеньненскай школы-інтэрнату. Яны распавялі арганізатарам пра тое, чаго чакаюць ад свайго далейшага лёсу, пра што яны мараць, што іх непакоіць і палохае.

Вольга Цімашэнка, прэсавы сакратар віцебскай Асацыяцыі прадпрымальнікаў і адна з галоўных ініцыятарак стварэньня выставы перакананая, што інтэрвію атрымаліся вельмі шчырымі і шчымлівымі:

Вольга Цімашэнка бярэ інтэрвію ў выпускнікоў
Вольга Цімашэнка бярэ інтэрвію ў выпускнікоў

«Каля двух месяцаў мы рыхтавалі гэтую фотавыставу: распрацоўвалі канцэпцыю, дамаўляліся наконт супрацоўніцтва. Дарэчы, усе ўдзельнікі нашага праекту працавалі на дабрачыннай аснове. Напрыклад, копіцэнтар „Колер“, дзе я зьяўляюся дырэктарам, абсалютна бясплатна надрукаваў усе здымкі. Фатографамі таксама былі я і вядомы ў Віцебску майстар, выкладчык тэхналягічнага каледжу Аляксей Карасёў. Каардынацыяй падрыхтоўкі займаўся наш прадпрымальніцкі Фонд духоўнага адраджэньня.

Працуе фатограф Аляксей Карасёў
Працуе фатограф Аляксей Карасёў

Першапачаткова ідэя была ў тым, каб сродкамі фатаграфіі паказаць тое, што палохае і непакоіць дзяцей, каб іх лепей разумелі дарослыя. У гэтай частцы ў якасьці фотамадэлі выступіла дырэктар салёну прыгажосьці Натальля Кісялёва. Але ж нічога б не атрымалася без удзелу саміх выпускнікоў. Адзінаццаціклясьнікі, трое дзяўчат і 10 хлопчыкаў распавялі пра тое, кім яны хочуць стаць. Падзяліліся тым, што іх хвалюе. І гэта ўжо не звычайныя дзіцячыя страхі, а перажываньні дзяцей, пазбаўленых сямейнай падтрымкі, якіх жыцьцё вымусіла так рана стаць самастойнымі».

Дзяўчынак рыхтуюць да фатасэсіі
Дзяўчынак рыхтуюць да фатасэсіі

На здымкі прадпрымальнікі прыяжджалі не з пустымі рукамі: прывезьлі ласункі і стужкі для выпускнікоў. Зь дзяўчатамі перад фатасэсіяй папрацавала візажыст і грымёр Людміла Кавалёва. У школе-інтэрнаце ёсьць уласная цырульня, гадаванцы практыкуюцца і ў гэтым майстэрстве. Але дзяўчаты нават не чакалі, што на фатаздымках атрымаюцца такія прыгожыя і дарослыя!

Фатаздымкі на «Дошцы гонару»
Фатаздымкі на «Дошцы гонару»

Фатаздымак з фотавыставы
Фатаздымак з фотавыставы

Пра тое, што іх палохае і трывожыць на парозе дарослага жыцьця, яны гаварылі падобна: што турбуюцца, ці дастаткова ў іх навыкаў па самаабслугоўваньні, што непакояцца, ці знойдуць падтрымку ў новым асяродку, бо ў школе-інтэрнаце былі «ўсе свае».

Хлопцы таксама казалі, што «не хацелі б сустрэць дрэнных людзей», і што нават паступаць будуць імкнуцца туды, дзе ўжо вучыліся знаёмыя — сваякі ці ранейшыя выпускнікі інтэрнату.

З усіх прафэсій, як для дзяўчынак, так і для хлопцаў, найбольш прывабнай падаецца прафэсія кухара. Яшчэ — майстра-лесавода, кіроўцы, будаўніка. Адна зь дзяўчат, выдатніца Валерыя, распавяла, што хоча атрымаць эканамічную адукацыю. Праўда, паступаць у вышэйшыя навучальныя ўстановы ніхто з выпускнікоў Сеньненскай школы—інтэрнату не наважыўся.

Адкрыцьцё фотавыставы
Адкрыцьцё фотавыставы

Аповеды пра падлеткаў разам зь іх фатаздымкамі былі прадстаўленыя гледачам у «Бітлз-клюбе «Паддашак». Паводле ўмоваў, платай за ўваход на выставу было любое дабрачыннае ахвяраваньне на карысьць сёлетніх выпускнікоў школы-інтэрнату ў Сянно. Паводле Вольгі Цімашэнкі, грошай за ўваход назьбіралі ня так шмат, як разьлічвалі. Аднак «у агульную скарбонку» пайшлі яшчэ й сродкі, сабраныя з продажу фатаздымкаў на аўкцыёне і па лятарэі. Агулам атрымалася каля 600 рублёў.

Арганізатараў віншуе дарэктар Асацыяцыі прадпрымальнікаў Ніна Лук’янава
Арганізатараў віншуе дарэктар Асацыяцыі прадпрымальнікаў Ніна Лук’янава

Арганізатары плянуюць, што фотавыстава будзе вандраваць па розных установах, і зьбіраньне дабрачынных унёскаў будзе працягвацца. Верагодна, будзе арганізаваны і інтэрнэт-аўкцыён — бо фатаздымкі прадпрымальніцы-мадэлі Натальлі Кісялёвай рабіліся менавіта для продажу за ахвяраваньні.

Фотамадэль — яшчэ адна ініцыятарка праекту Натальля Кісялёва
Фотамадэль — яшчэ адна ініцыятарка праекту Натальля Кісялёва

Фатаздымкі выпускнікоў арганізатары выставы плянуюць падараваць Сеньненскай школе-інтэрнату, дзе была шчыра падтрыманая іхняя ініцыятыва. Сабраныя сродкі будуць перададзеныя адміністрацыі навучальнай установы. Там дапамогуць набыць хаця б самае неабходнае на першым этапе самастойнага жыцьця, чаго выпускнікі ня маюць. Найперш гэта побытавыя рэчы, якія спатрэбяцца пасьля выхаду з інтэрнату, — посуд, пасьцельная бялізна, бытавая тэхніка. Фатаздымкі, напэўна, таксама дастануцца выпускнікам — на памяць пра дзяцінства, якое ня дужа часта радавала шчасьлівымі момантамі.

Афармленьнем залі займаліся таксама нядаўнія выпускнікі — студэнты тэхналягічнага ўнівэрсытэту
Афармленьнем залі займаліся таксама нядаўнія выпускнікі — студэнты тэхналягічнага ўнівэрсытэту

Першыя гледачы фотавыставы
Першыя гледачы фотавыставы

Ваша меркаваньне

Паказаць камэнтары

XS
SM
MD
LG