Лінкі ўнівэрсальнага доступу

«Кандыдат чыстай вады» дамогся забароны на хлёрку. Ці надоўга?


Юрась Меляшкевіч

Пітная вада для жыхароў шэрагу мікрараёнаў на Паўднёвым Захадзе Менску (Сухарава, Малінаўка, Кунцаўшчына) стала лепшай якасьці. Пра гэта Свабодзе сказаў намесьнік старшыні руху «За свабоду» Юрась Меляшкевіч. Ён жыве ў Малінаўцы і ўжо 10 гадоў змагаецца з уладамі за права на чыстую ваду.

«Урэшце мясцовыя ўлады паклапаціліся пра людзей. Яны запусьцілі іншую сыстэму ачышчэньня з выкарыстаньнем гіпахлярыту натрыю. Я даведаўся, што цяпер з крана ідзе ня хлёрная вада, як раней, а дадаецца мякчэйшы рэагент. І якасьць, і смак вады палепшыліся.

Пакуль усё нядрэнна. Але трэба паглядзець, як гэтая тэхналёгія ўпраўляецца ў сьпякотны час. Гэта вельмі важна, бо ў сьпякоту вада якраз горш ачышчаецца. Таму трэба вызначыцца, ці хапае для якасьці вады новай тэхналёгіі, ці настойваць на дадатковых зьменах. Карацей, неабходна пабачыць, як новая тэхналёгія спрацоўвае ў розныя пэрыяды году», — кажа спадар Меляшкевіч.

Юрась Меляшкевіч скончыў Беларускі дзяржаўны тэхналягічны ўнівэрсытэт па спэцыяльнасьці «Біяэкалёгія». Некалькі разоў балятаваўся ў дэпутаты Палаты прадстаўнікоў і сталічнага гарсавету. У цэнтры ягонай праграмы было вырашэньне праблемаў зь якасьцю пітной вады. Хтосьці так і назваў яго — «кандыдатам чыстай вады».

Сёньня спадар Меляшкевіч заявіў, што зьбіраецца ўдзельнічаць у мясцовых выбарах, якія павінны прайсьці ў Беларусі ў лютым 2018 году. Ён будзе выступаць за перавод усяго Менску на артэзіянскую ваду.

Ваша меркаваньне

Паказаць камэнтары

XS
SM
MD
LG