Былы дарадца прэзыдэнта ЗША Дональда Трампа гатовы супрацоўнічаць з Сэнатам па справе аб сувязях з Расеяй. Пра гэта са спасылкай на ўласныя крыніцы паведамляе агенцтва Associated Press.
Флін прадставіць у сэнацкі камітэт выведкі дакумэнты па справе аб умяшаньні Расеі ў амэрыканскія выбары ў лістападзе летась. Раней ён адмаўляўся даваць паказаньні на слуханьнях, спасылаючыся на права ня сьведчыць супраць сябе. Дакумэнты, якія перадасьць Флін, датычныя дзьвюх ягоных кампаніяў.
Трамп звольніў Фліна ў лютым пасьля абвінавачваньняў у тым, што ён схаваў ад уладаў свае кантакты з паслом Расеі ў Вашынгтоне. Паводле СМІ, дарадца Трампа яшчэ да інаўгурацыі абмяркоўваў з расейскім чыноўнікам магчымасьці адмены санкцый супраць Масквы. У Крамлі ўмяшаньне ў амэрыканскія выбары адмаўляюць.
