У МУС Вялікабрытаніі заяўляюць, што члены сеткі, у якую ўваходзіў Салман Абэдзі, сьмяротнік, які зьдзейсьніў напад у Манчэстэры, да гэтага часу могуць заставацца на волі. Але, паводле інфармацыі сілавікоў, узровень пагрозы ў краіне ўдалося значна зьнізіць.
Амбэр Рад, брытанскі міністар унутраных справаў, 28 траўня ў інтэрвію BBC адзначыла, што «аперацыя працягваецца».
У Вялікабрытаніі ўзмоцьненыя захады бясьпекі. У ноч на 23 траўня ў Манчэстэры адбыўся выбух на тэрыторыі канцэртнай арэны пасьля канцэрта амэрыканскай сьпявачкі Арыяны Грандэ. У выніку выбуху 22 чалавекі загінулі, яшчэ 59 былі параненыя.
Сьмяротніка, які ўчыніў выбух, ідэнтыфікавалі як 22-гадовага ўраджэнца Вялікабрытаніі, лібійца паводле паходжаньня, Салмана Абэдзі.
У гэтай справе затрымалі ўжо 11 чалавек, сярод якіх старэйшы брат Абэдзі. Яшчэ аднаго ягонага брата і бацьку затрымалі ў Лібіі.
Групоўка «Ісламская дзяржава» ўзяла на сябе адказнасьць за выбух.
