Лінкі ўнівэрсальнага доступу

Трамп сустракаецца з кіраўнікамі арабскіх краін Пэрсыдзкай затокі


Прэзыдэнт ЗША Дональд Трамп і кароль Савудаўскай Арабіі Салман бін Абдулазіз аль-Сауд

Прэзыдэнт ЗША Дональд Трамп правёў у нядзелю 21 траўня перамовы ў Эр-Рыядзе зь лідэрамі краін, якія ўваходзяць у Раду супрацоўніцтва арабскіх дзяржаваў Пэрсыдзкай затокі.

У дамове, заключанай па выніках сустрэчы Трампа з кіраўнікамі Бахрэйну, Катару, Кувэйту, Абʼяднаных Арабскіх Эміратаў, Аману і Саудаўскай Арабіі, пазначана сумеснае абавязацельства спыняць фінансаваньне тэрарызму, у тым ліку на індывідуальным узроўні.

Дарадца Белага дому Дзіна Паўэл выказала спадзяваньне, што ў гэтага «абавязацельства не фінансаваць тэрарыстычныя арганізацыі будуць самыя далёкія наступствы», уключаючы крымінальны перасьлед парушальнікаў.

У той жа дзень Дональд Трамп выступіць перад лідэрамі больш за 50 мусульманскіх краін з заклікам супрацьдзейнічаць экстрэмізму і «выгнаць тэрарыстаў зь месцаў адпраўленьня рэлігійных абрадаў». Пра гэта паведаміла агенцтва Ассошиэтед Прэс, якое атрымала чарнавы канспэкт прамовы прэзыдэнта ЗША.

Трамп прыбыў у Савудаўскую Арабію — першую краіну ў сваім першым замежным турнэ на прэзыдэнцкай пасадзе — 20 траўня. Затым ён наведае Ізраіль, Ватыкан, Бэльгію і прыбудзе на Сыцылію, дзе возьме ўдзел у саміце «вялікай сямёркі».

У Брусэлі амэрыканскі прэзыдэнт возьме ўдзел у неафіцыйнай сустрэчы з кіраўнікамі краінаў НАТО, а ў Ватыкане сустрэнецца з Папам Францішкам.

XS
SM
MD
LG