Прэзыдэнту ЗША Дональду Трампу ўручылі найвышэйшую ўзнагароду Савудаўскай Арабіі — ордэн імя караля Абдэль Азіза, заснавальніка кіроўнай дынастыі. Узнагароду Трампу ўручыў цяперашні кароль Салман. Прэзыдэнт ЗША знаходзіцца ў Рыядзе зь візытам.
У Белым доме ўжо заявілі, што па выніках перамоваў плянуецца падпісаць дамову аб закупцы амэрыканскіх узбраеньняў на суму больш за сто мільярдаў даляраў. Чыноўнікі адзначаюць, што дамова накіраваная супраць «іранскай пагрозы» і дэманструе прыхільнасьць ЗША бясьпецы ў рэгіёне.
Таксама чакаецца падпісаньне пагадненьня аб зборцы ў Савудаўскай Арабіі 150 амэрыканскіх верталётаў Blackhawk. Краіны ўжо дамовіліся аб партнэрстве ў сфэры разьвіцьця сыстэм супрацьпаветранай абароны.
Трамп спадзяецца палепшыць адносіны з Савудаўскай Арабіяй, панізіўшы прыярытэтнасьць пытаньняў правоў чалавека ў двухбаковых адносінах і засяродзіўшыся на барацьбе з тэрарызмам.
Эр-Рыяд стаў пачатковым пунктам першага замежнага турнэ Трампа. Затым ён наведае Ізраіль, Ватыкан, Бэльгію і прыбудзе на Сыцылію, дзе прыме ўдзел у саміце «Вялікай сямёркі».
