Лінкі ўнівэрсальнага доступу

У Менску адкрылася выстава ўзбраеньняў


Выстава Milex, архіўнае фота

Восьмы раз у Менску адкрылася міжнародная выстава ўзбраеньняў і вайсковай тэхнікі Milex.

Як паведамілі ў прэс-службе Дзяржкамваенпрама, выставу наведаюць больш за 50 афіцыйных дэлегацый з 30 краін — як традыцыйных дзяржаў-партнэраў, так і патэнцыйных дзяржаў-заказчыкаў беларускай вайсковай тэхнікі і ўзбраеньня.

Самыя прадстаўнічыя ўдзельнікі выставы з Расеі і Кітаю. Упершыню бяруць удзел кампаніі з Германіі, Славаччыны і Польшчы.

Экспанаваць сваю прадукцыю будуць амаль 80 беларускіх прадпрыемстваў і ўстаноў адукацыі. Арганізацыі, якія ўваходзяць у сыстэму беларускага Дзяржкамваенпрама, упершыню на выставе прэзэнтуюць каля 90 узораў узбраеньня, ваеннай і спэцыяльнай тэхнікі.

Асноўнай пляцоўкай выставы стаў спарткомплекс «Менск-арэна».

Напярэдадні старшыня Дзяржаўнага вайскова-прамысловага камітэту Сяргей Гурулёў, прэзэнтуючы праграму выставы Milex-2017, сказаў, што Беларусь за апошнія пяць гадоў роўна ўдвая павялічыла экспарт прадукцыі вайсковага прызначэньня.

Паводле яго, у 2016 годзе пастаўкі ўзбраеньняў і абсталяваньня дасягнулі 1 мільярда даляраў. Гэты абʼём быў дасягнуты дзякуючы пастаяннаму пашырэньню рынку збыту:

«Цяпер узаемадзейнічаем з 52 краінамі, з больш як 30 працуем на заканадаўчым узроўні ў галіне вайскова-тэхнічнага супрацоўніцтва. Шырока прадстаўленыя ў СНД, Паўднёва-Ўсходняй Азіі, Паўднёвай Амэрыцы, Эўропе, на афрыканскім кантынэнце. Традыцыйна добрыя ўзаемаадносіны з Інданэзіяй, Малайзіяй, дабраліся нават да Аўстраліі і Філіпінаў», — кажа Гурулёў.

На яго перакананьне, сёньня важна працаваць з замежнымі пакупнікамі комплексна — прапаноўваць ня часткі чаго-небудзь, а цэлыя комплексы.

Паводле Гурулёва, для беларускага абароннага сэктару плятформа Milex — зручная пляцоўка для рэалізацыі пэрспэктыўных праектаў, выхаду на новы тэхналягічны ўзровень.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG